BleepingComputer xəbər verir ki, "Sony Group Corporation"un törəmə şirkəti olan "Sony Network Communications" təxminən 2,5 milyon qeydi əhatə edən məlumat sızmasını təsdiqləyib. Şirkət Yaponiyada internet provayderi kimi fəaliyyət göstərir.

Hücum oktyabrın 19-da baş verib və dörd gün sonra aşkarlanıb. Bundan sonra şirkət zərər görmüş serverləri söndürüb və xarici əlaqəni bloklayıb. Araşdırma nəticəsində "So-net" üzv bazasından cəmi 2 585 481 qeydin ifşa olunduğu müəyyənləşib.

Sızan məlumatlar arasında tam adlar, telefon nömrələri, e-poçt ünvanları, istifadəçi identifikatorları, doğum tarixləri, cins və internet bağlantı identifikatorları var. Bank və ödəniş kartı məlumatlarının sızmadığı bildirilib. Bununla yanaşı, 54 401 e-poçt ünvanı şifrələrlə birlikdə ifşa olunub və istifadəçilərə şifrələrini dəyişmək tövsiyə edilib.

Qeydlərin 2 141 986-sı "So-net", 443 495-i isə "plala" xidmətinə aiddir. Sonuncu "Docomo Hikari" xidməti üzrə "NTT Docomo" müştərilərinə təsir edib. "NTT Docomo" müştərilərini saxta e-poçt və fişinq saytları barədə xəbərdar edib. Oktyabrın 27-nə olan məlumata görə, sızan məlumatlardan sui-istifadə halı təsdiqlənməyib.

Qeyd edək ki, bu il Yaponiyada iri şirkətlərə qarşı bir sıra kiberhücumlar qeydə alınıb. Onların arasında 12 milyon müştərini əhatə edən "KDDI" sızması və "IDC Frontier"ə qarşı fidyə proqramı hücumu var. Hücumların sayı ölkə hökumətini təcili iclaslar keçirməyə vadar edib.