The Verge xəbər verir ki, "TP-Link" ABŞ-da Wi-Fi routerlərinin istehsalı üçün təxminən 1 milyard dollar investisiya qoymağa hazır olduğunu bildirib. Şirkət bu təklifi ABŞ Federal Rabitə Komissiyasına (FCC) göndərdiyi məktubda irəli sürüb və qarşılığında routerlərinin xarici router qadağasından azad edilməsini istəyib.
Məktuba əsasən, layihə növbəti dörd il ərzində tədqiqat, istehsal və tikinti sahələrində yüzlərlə yüksək maaşlı iş yeri yaradacaq. Şirkət yeni Wi-Fi 8 cihazlarını gələn ildən ABŞ-da yığmağa başlaya biləcəyini qeyd edib. "TP-Link" bu yaxınlarda ilk Wi-Fi 8 routerlərini təqdim etsə də, qadağa səbəbindən onları ABŞ bazarına çıxara bilmir.
Rəqib "Netgear" və "Asus" routerlərini Asiyada istehsal etsələr də, bütün yeni məhsulları üçün ümumi istisna əldə ediblər. Halbuki FCC-nin sənədlərinə görə, istisna almaq üçün şirkət ABŞ-da istehsal planı təqdim etməlidir. "Asus" belə plan təqdim edib-etmədiyini təsdiqləməyib. Nəşr "TP-Link"in hələ istisna ala bilməməsini Çinlə iddia edilən əlaqələri ilə izah etməyin mümkün olduğunu yazıb.
Bundan əlavə, FCC 2028-ci ilin dekabrından etibarən Çin laboratoriyalarının ABŞ üçün cihaz sınaqları aparmasını tamamilə dayandırmağı planlaşdırır. Komissiya yalnız ABŞ ilə qarşılıqlı iqtisadi münasibəti olan ölkələrin laboratoriyalarına icazə verməyi təklif edir.
Qeyd edək ki, ABŞ hökuməti 2025-ci ilin dekabrında bütün yeni xarici dronlara qadağa qoyub, daha sonra routerlər, robotlar, o cümlədən robot-tozsoranlar və güc invertorları üçün də oxşar məhdudiyyətlər tətbiq edilib. Hökumət bu addımları milli təhlükəsizliklə əsaslandırsa da, təhlükəyə dair ictimai sübut təqdim etməyib.
Mənbə: The Verge
Bizi izləyin
Ən vacib texnologiya xəbərlərini sosial şəbəkələrdə qaçırmayın.
Növbəti xəbər
