TechCrunch xəbər verir ki, "Meta" şirkəti səs-küysüz şəkildə "Style Sketch" adlı süni intellekt əsaslı moda tətbiqini istifadəyə verib. Tətbiq istifadəçilərə artıq sahib olduqları geyimlərdən obraz ideyaları hazırlamağa kömək edir.

"Style Sketch" "Instagram" hesabına qoşularaq paylaşılan fotolardan virtual qarderob yaradır. Geyimləri əl ilə də əlavə etmək mümkündür: bunun üçün şəkil çəkmək, qısa video yazmaq və ya qalereyadan foto yükləmək kifayətdir. Tətbiq daha sonra istifadəçinin üslubuna uyğun kombinasiyalar təklif edir və onları bədən quruluşu və dəri rənginə uyğunlaşdırılmış realistik model üzərində sınamağa imkan verir.

İstifadəçi qarderobdan konkret bir əşyanı seçərək onun ətrafında yeni obrazlar ala bilər. Səyahət planlaması funksiyası isə istiqamət, səfərin müddəti və planlaşdırılan fəaliyyətlərə əsasən hava proqnozunu nəzərə alan gündəlik geyim planı hazırlayır.

Tətbiqi ilk dəfə sosial media məsləhətçisi Matt Navarra aşkar edib. Hazırda "Style Sketch" İndoneziya, Sinqapur və Taylandda "iOS" və "Android" platformalarında əlçatandır. "Meta" TechCrunch-ın sorğusuna cavab verməyib və tətbiqin digər ölkələrdə təqdim olunub-olunmayacağı məlum deyil.

Qeyd edək ki, son aylarda "Meta" bir neçə süni intellekt tətbiqi buraxıb, o cümlədən "Waddle World", oyun yaratmaq üçün "Pocket" və video generasiya edən "Vibes". The Wall Street Journal-ın məlumatına görə, şirkətin baş direktoru Mark Zukerberq süni intellektin sürətləndirdiyi proseslər hesabına əvvəlkindən daha çox tətbiq buraxmağı planlaşdırdıqlarını bildirib.