The Register xəbər verir ki, Çin bəzi süni intellekt texnologiyalarının ixracına məhdudiyyət tətbiq edib, lakin qısa müddət sonra aparıcı şirkətlərindən ikisinə xarici bazarlarda satışı davam etdirməyə icazə verib.

Çin Ticarət Nazirliyi oktyabrın ortalarında ixracı qadağan olunan və məhdudlaşdırılan texnologiyalar kataloquna dəyişiklik edib. Yeni qaydalara görə, siyahıdakı texnologiyaları xaricə satmaq istəyən şirkətlər lisenziya almalıdır. Kataloqa iri modellər, ağıllı agentlər, hesablama klasterləri və məlumat emalı ilə bağlı 23 texnologiya əlavə olunub. Açıq mənbə lisenziyası ilə yayılan texnologiyalar bu məhdudiyyətlərdən azaddır.

Ötən cümə Çin dövlət mediası iki şirkətin ixraca davam etmək üçün icazə aldığını bildirib. Digər mənbələr bu şirkətlərin "DeepSeek" və "MiniMax" olduğunu açıqlayıb. Hər iki şirkət Amerika süni intellekt şirkətlərinin ciddi rəqibi hesab olunur və onların xaricdə fəaliyyəti Çinin ixrac sənayesi yaratmaq və texnologiya sektorunu gücləndirmək məqsədlərinə uyğundur.

Genişləndirilmiş kataloq həm də Pekinə mühüm suveren imkan saydığı istənilən süni intellekt məhsulunun ixracını dayandırmaq səlahiyyəti verir. Bura proqram təminatında zəiflikləri effektiv aşkarlayan və ya hərbi təyinatlı ola biləcək alətlər aid edilir.

Qeyd edək ki, süni intellekt texnologiyalarının ixracını məhdudlaşdıran tək ölkə Çin deyil. ABŞ da Çinə qabaqcıl qrafik prosessorların satışına dövri olaraq qadağalar tətbiq edib və bəzən onları yumşaldıb.