Engadget xəbər verir ki, "Microsoft" "Xbox Game Pass" abunə xidmətində ciddi dəyişikliyə hazırlaşır. Məlumata görə, abunəçilər hazır paketlər əvəzinə hansı funksiyalar üçün pul ödəyəcəklərini özləri seçə biləcəklər.

"Fortune" nəşri oktyabr ayında "Xbox"un rəhbəri Aşa Şarma haqqında hazırladığı materialda bildirib ki, yeni sistemdə yalnız konsol oyunları, bulud oyun xidməti və onlayn multiplayer kimi əlavələr ayrıca seçilə biləcək. Bununla belə, xidmətin müəyyən pilləli struktur üzərində işləyəcəyi qeyd olunub. Daha əvvəl "Windows Central" da "Xbox"un istifadəçilərə, məsələn, "Fortnite Crew" kimi daxil edilmiş abunələrdən imtina edərək qiyməti azaltmaq imkanı verməyi düşündüyünü yazmışdı.

Hazırda "Game Pass"in dörd tarifi mövcuddur: aylıq 23 dollarlıq "Ultimate" 500-dən çox oyun, ilk gündən yeni buraxılışlar və 15 saatadək bulud oyunu təklif edir. "Premium" tarifi aylıq 15 dollar, "Essential" 10 dollar, "PC Game Pass" isə 14 dollardır.

Yeni sistemin praktikada necə işləyəcəyi hələlik məlum deyil. Şirkət artıq "Game Pass" abunəçisi olmayan istifadəçilərə də oyunları pulla yayımlamaq imkanını sınaqdan keçirir.

Qeyd edək ki, Aşa Şarma fevral ayında "Xbox"a rəhbərlik etməyə başlayandan sonra bölmədə ixtisarlar, studiya satışları və məhsul dəyişiklikləri baş verib. Onun ilk qərarlarından biri 2025-ci ildəki bahalaşmadan sonra "Game Pass Ultimate"in qiymətini endirmək olub. Bundan əlavə, növbəti nəsil "Project Helix" konsollarının qiymətinin 1800 dollardan başlaya biləcəyi bildirilir.