TechCrunch xəbər verir ki, məşhur restoran şəbəkəsi "Applebee's" mobil tətbiqində daxili verilənlər bazasının parolunun saxlanılması səbəbindən qeydiyyatdan keçmiş müştərilərin şəxsi məlumatlarını açıq qoyub. Şirkət problemin aradan qaldırıldığını təsdiqləyib.

Boşluğu Böyük Britaniyada fəaliyyət göstərən "What Security" şirkətinin kibertəhlükəsizlik üzrə tədqiqatçısı Robert Uiqqins aşkar edib. O, "Google Play"də bir milyondan çox endirilən "Android" tətbiqinin minlərlə sətirlik mənbə kodunda gizlənmiş parolu süni intellektin köməyi ilə tapıb. Tədqiqatçının sözlərinə görə, bu parol vasitəsilə bazadakı məlumatları dəyişmək də mümkün idi.

Açıq qalan bazada müştərilərin adları, e-poçt ünvanları, doğum tarixləri, telefon nömrələri və poçt indeksləri, həmçinin veteran statusu və son girişlərin IP ünvanları yer alıb. Zərər çəkən istifadəçilərin sayı məlum deyil. "Applebee's" və ana şirkət "Dine Brands"in təhlükəsizlik problemlərini bildirmək üçün kanalı olmadığından, tədqiqatçı məlumatı TechCrunch vasitəsilə çatdırıb.

"Dine Brands" nümayəndəsi bildirib ki, araşdırma başladılıb və hələlik icazəsiz girişə dair sübut tapılmayıb. Lakin şirkət server qeydlərinin olub-olmadığını və müştəriləri məlumatlandırıb-məlumatlandırmayacağını açıqlamayıb.

Qeyd edək ki, keçən il "Applebee's"in mükafat proqramında ən azı 8,5 milyon müştəri qeydiyyatda olub. Parolun proqram təminatının koduna birbaşa yazılması ən ciddi təhlükəsizlik boşluqlarından sayılır, çünki tətbiqə sahib olan istənilən şəxs onu çıxarıb istifadə edə bilər.