The Verge xəbər verir ki, "Apple" "Apple Intelligence" süni intellekt funksiyalarını "iOS 27.3" yeniləməsi ilə Çin bazarına çıxaracaq. Şirkət bunu Çin xəbər saytında açıqlayıb. Funksiyalar əvvəlcə noyabrın 4-də başlayacaq beta versiyada, tam yeniləmə isə dekabrda təqdim olunacaq.

Bu buraxılışa yeni "Siri AI" daxil deyil. Bunun əvəzinə bildiriş xülasələri, real vaxtda tərcümə, mətnin yenidən yazılması və korrektəsi alətləri, vizual intellekt, fotolardan obyektlərin silinməsi, "Genmoji" və təbii dildə foto axtarışı kimi əvvəlki funksiyalar istifadəçilərə təqdim ediləcək.

"Apple" bəzi funksiyalarda "Alibaba" şirkətinin "Qwen" çatbotuna dəstək əlavə etdiyini bildirib. 9to5Mac-ın yazdığına görə, "Qwen" "Siri", yazı alətləri və vizual intellektlə işləyəcək, istifadəçilər fotolar və sənədlər barədə suallar verə biləcəklər. Bu inteqrasiya 2024-cü ildə istifadəyə verilən "ChatGPT" dəstəyinə bənzəyir.

İlkin mərhələdə funksiyalar yalnız "iPhone" üçün əlçatan olacaq. Onlar "iPhone 15 Pro", "iPhone 15 Pro Max", "iPhone 16" və sonrakı modellər, həmçinin "iPhone Air" və "iPhone Duo"da işləyəcək. Bunun üçün cihazın və "Siri"nin dili ingilis və ya sadələşdirilmiş Çin dilinə qurulmalıdır.

Qeyd edək ki, "Apple Intelligence" Çində iyul ayında tənzimləyicilərin təsdiqini alıb. Reuters avqustda "Apple"ın Çin üçün xüsusi böyük dil modeli öyrətdiyini yazmışdı. Digər platformalara dəstək isə müvafiq icazələr alındıqdan sonra əlavə olunacaq.