GSMArena xəbər verir ki, "Apple" şirkətinin bu həftə təqdim etdiyi "iPad mini (2026)" planşetinin batareya tutumu Avropa İttifaqının EPREL məlumat bazasında açıqlanıb. Şirkət təqdimatda batareyanın yalnız 18,9 Vt·saat olduğunu bildirib, mAh göstəricisini isə açıqlamayıb.

A3596 model nömrəli cihazın qeydiyyatına görə, yeni planşetin batareya tutumu 4900 mAh-dır. Bu, "iPad mini (2024)" modelindəki 5078 mAh (19,3 Vt·saat) batareyadan bir qədər azdır. Yeni model sələfindən təxminən 1 mm nazik və 40 qrama yaxın yüngüldür.

Məlumata əsasən, batareya ilkin tutumunun 80 faizinə düşənə qədər 1000 tam şarj dövrünə davam gətirir və Aİ-nin standart testində bir şarjla 78 saat işləyir. Batareya istifadəçi tərəfindən dəyişdirilə bilmir, şirkət ən azı 20 Vt gücündə şarj cihazı tövsiyə edir.

Planşet enerji səmərəliliyi üzrə D, təmir edilə bilmə üzrə C, düşməyə davamlılıq üzrə isə D sinfi alıb: cihaz 57 düşmədən qüsursuz çıxıb. Bazada həmçinin IP67 qorunma dərəcəsi, Mohs şkalası üzrə 4-cü səviyyə cızılmaya davamlılıq və ən azı beş il proqram təminatı yeniləməsi təsdiqlənib.

Qeyd edək ki, "iPad mini (2026)" OLED ekran və "A20 Pro" prosessoru ilə təchiz olunub. Planşetin qiyməti 699 dollar, 749 avro və ya 699 funt sterlinqdən başlayır, ilkin sifarişlər artıq qəbul edilir, ilk cihazlar isə 6 noyabrda alıcılara çatdırılacaq.