Engadget xəbər verir ki, "Apple"ın "iPhone Duo" və "Google"un "Pixel 11 Pro Fold" qatlanan smartfonları dizayn və texniki göstəricilər baxımından xeyli fərqlənir. "Apple" "pasport" tipli geniş formaya üstünlük verib, "Google" isə daha ənənəvi kvadrata yaxın ekranı saxlayıb.

"iPhone Duo"nun xarici ekranı 5,4, daxili ekranı isə 7,6 düymədir. "Pixel 11 Pro Fold"da bu göstəricilər müvafiq olaraq 6,5 və 8 düymədir. "Google"un ekranları 3600 nitə qədər parlaqlığa çatır, "Apple" cihazında isə maksimum 3000 nitdir, lakin qatlanan ekranda parıltını və bükülmə izini azaldan nano-tekstura qatı var. "iPhone Duo" 254 qram çəkiyə və qapalı vəziyyətdə 11,3 mm qalınlığa malikdir, "Pixel" isə 239 qram və 10,1 mm-dir. Hər iki model IP68 sertifikatı alıb.

Kamera sahəsində üstünlük "Google"dadır: 48 meqapiksellik əsas kameraya 10 meqapiksellik ultragenişbucaqlı və optik zuma malik telefoto modul əlavə olunub. "iPhone Duo"da isə iki 48 meqapiksellik kamera var, optik zum yoxdur. Bunun əvəzində "Apple" smartfonu 60 Vt-lıq adapterlə 20 dəqiqəyə 50 faiz dolur, "Pixel" isə 30 Vt güclə bu həddə 30 dəqiqəyə çatır.

"Apple" iddia edir ki, "iPhone Duo" daxili ekranda 31 saat, xarici ekranda 44 saat video oynada bilir. "Pixel 11 Pro Fold" isə testlərdə xarici ekranda təxminən 27 saat işləyib. "iOS 27" cihaz üçün xüsusi olaraq uyğunlaşdırılıb və bölünmüş ekran rejimi kimi funksiyalar alıb.

Qeyd edək ki, "iPhone Duo"nun qiyməti 256 GB versiya üçün 1999 dollardan başlayır, 2 TB versiya isə 3199 dollardır. Cihaz 23 oktyabrda satışa çıxacaq. Artıq satışda olan "Pixel 11 Pro Fold"un başlanğıc qiyməti isə 1899 dollardır.