Səs klonlama ilə fırıldaqçılıq artır: mütəxəssislər qorunma yollarını açıqlayıb

Mashable xəbər verir ki, fırıldaqçılar süni intellekt vasitəsilə yaxın insanların səsini klonlayaraq istifadəçilərdən şəxsi məlumat və pul ələ keçirirlər. Zəng edən şəxs ailə üzvü kimi təqdim olunur, qəza, həbs və ya hesaba giriş problemi bəhanəsi ilə kömək istəyir.

"NordVPN" şirkətinin məlumatına görə, qaranlıq şəbəkə forumlarında və "Telegram" kanallarında səs klonlama xidmətlərinə dair satış təklifləri son iki ildə yeddi dəfə artıb. Araşdırma göstərib ki, limitsiz səs klonlama imkanı olan sındırılmış "ElevenLabs Scale" hesabı cəmi 150 dollara, "ElevenLabs" API açarı isə 8 dollara satılır. Bu alətlər indi şəxsi məlumat bazaları ilə birlikdə hazır "fırıldaqçılıq dəstləri" şəklində təklif olunur.

"NordVPN"-in texnologiya direktoru Marijus Briedis bildirib ki, bir neçə il əvvəl klonlanmış səsdə nəsə qeyri-təbii hiss olunurdu, indi isə bu fərq aradan qalxıb. Mütəxəssislər yaxınlarla gizli kod söz razılaşdırmağı, şübhəli zəngi dayandırıb şəxsə tanış nömrədən geri zəng etməyi tövsiyə edir. Bank və ya iş yeri adından gələn zənglərdə rəsmi saytdakı nömrə ilə əlaqə saxlamaq lazımdır.

Ekspertlərin sözlərinə görə, telefonla pul tələbi, kod və ya parol istənilməsi, hədiyyə kartı, kriptovalyuta və ya pul köçürməsi ilə ödəniş tələbi əsas təhlükə siqnallarıdır. Demək olar ki, hər uğurlu fırıldaqçılıqda süni təcililik hissi və məxfilik tələbi yaradılır, buna görə tələsmədən məlumatı yoxlamaq tövsiyə olunur.

Qeyd edək ki, 2025-ci ildə amerikalılar rəqəmsal cinayətlər nəticəsində təxminən 148,2 milyard dollar itirib ki, bu da əvvəlki illə müqayisədə 25 faizdən çox artım deməkdir.