9to5Mac "Counterpoint Research" şirkətinin yeni hesabatına istinadən xəbər verir ki, "Apple" 2026-cı ilin üçüncü təqvim rübündə qlobal smartfon bazarının gəlirinin təxminən yarısını əldə edib. Bu, şirkətin üçüncü rüb üzrə bazar gəlirindəki ən yüksək payı sayılır.

Hesabata görə, gəlir payında ikinci yeri 19 faizlə "Samsung" tutub. Onu 6 faizlə "Xiaomi", 5 faizlə "OPPO" və 4 faizlə "vivo" izləyib.

"Apple" üçüncü rübdə qlobal smartfon gəlirinin yarısını əldə edib
9to5Mac

Daha bir rekord "iPhone"un orta satış qiyməti ilə bağlıdır: bu göstərici ötən illə müqayisədə 19 faiz artaraq 1031 dollara çatıb. "Counterpoint" şirkətinin tədqiqat direktoru Tarun Pathak bildirib ki, artıma "iPhone 18 Pro" seriyasının daha yüksək başlanğıc qiymətləri, baza "iPhone 18" modelinin təqdimatda olmaması və sentyabrda köhnə modellərin bahalaşması təsir edib. Onun sözlərinə görə, "Apple" yaddaş xərclərinin artımını istehlakçılara ötürmək imkanına malikdir və bu, tələbata ciddi təsir göstərməyib.

Analitik həmçinin qeyd edib ki, "Apple" rübdə tədarük həcmini ötən illə demək olar ki, eyni səviyyədə saxlayıb və bazarda ən dayanıqlı böyük brend olub.

Qeyd edək ki, tədarük payında liderlik hələ də "Samsung"dadır, lakin onun "Apple" üzərindəki üstünlüyü azalıb: qlobal smartfon tədarükündə "Samsung"un payı 22 faiz, "Apple"ın payı isə 21 faiz təşkil edib.