The Verge xəbər verir ki, "Nintendo" "Switch" oyun kartricləri üçün yaddaş çipləri tədarük edən əsas şirkətlərdən birini itirir. Tayvanın "Macronix" şirkəti rüblük maliyyə hesabatının təqdimatında ROM istehsalını mərhələli şəkildə dayandıracağını açıqlayıb. Bu barədə ilk dəfə "Taipei Times" yazıb.

Şirkət bundan sonra məlumat mərkəzləri üçün NOR fləş yaddaşa diqqət yetirəcək. 2026-cı ilin üçüncü rübündə "Macronix"in ROM gəlirləri ötən illə müqayisədə 39 faiz azalıb, NOR yaddaşdan gəlirləri 158 faiz, NAND yaddaşdan gəlirləri isə 768 faiz artıb. Şirkətin rəhbəri Miin Vu məlumat mərkəzlərində NOR-a tələbatın çox güclü olduğunu bildirib.

Engadget-in məlumatına görə, ROM hazırda "Macronix"in satışlarının cəmi 5 faizini təşkil edir, ötən il bu göstərici 26 faiz idi. Şirkət üçüncü rübdə 337 milyon dollar rekord xalis mənfəət əldə edib. Bununla belə, "Switch 2" kartricləri NAND fləş yaddaşdan istifadə etdiyi üçün qərar onlara eyni dərəcədə təsir etməyəcək.

Qeyd edək ki, "Sony" 2028-ci ilin yanvarından fiziki oyun disklərinin istehsalını dayandırmağı planlaşdırır, "Nintendo" isə fiziki oyunlardan imtina etmək niyyətində olmadığını bildirib. Avqustda şirkət fiziki oyunların satışlarının 38,5 faizini təşkil etdiyini açıqlamışdı. Təxminən bir il əvvəl "Micron" da süni intellekt məlumat mərkəzlərinə fokuslanmaq üçün istehlakçı brendi "Crucial"ı bağlamışdı.