Engadget xəbər verir ki, NASA-nın "Neil Gehrels Swift" rəsədxanası 4 noyabrda, Şərq vaxtı ilə təxminən saat 03:30-da Yer atmosferinə daxil olacaq. Bu proqnozu ABŞ Silahlı Qüvvələri verib, lakin dəqiq vaxtda 11 saatlıq qeyri-müəyyənlik var.

Təxminən 3200 funt ağırlığında olan kosmik aparat 22 il əvvəl orbitə buraxılıb. Onun orbiti sürətlə alçaldığı üçün NASA iyulun əvvəlində "Swift Boost" missiyasını başladıb. Plana görə, "Katalyst Space" şirkətinin "LINK" robot aparatı rəsədxanaya birləşib onu daha yüksək orbitə qaldırmalı idi.

Lakin "LINK" kosmosda istiqamətini idarə edə bilməyib, nəzarətsiz fırlanmağa başlayıb və bu, rabitə problemlərinə səbəb olub. Bir neçə həftə sonra NASA missiyanı dayandırıb, oktyabrın sonunda isə təhlükəsiz rejimə keçən "Swift"in işini rəsmi olaraq bitirib.

NASA bildirib ki, aparatın böyük hissəsi atmosferdə yanacaq, bəzi komponentlər isə yerə düşə bilər. Agentliyin sözlərinə görə, qalıqların kiməsə zərər vurma ehtimalı çox aşağıdır. Düşüş prosesi izlənilir və proqnozlar yenilənəcək.

Qeyd edək ki, "Swift" fəaliyyəti dövründə kainatın ən güclü partlayışları olan 2000-dən çox qamma-şüa partlayışını müşahidə edib. Teleskop həmçinin 1400 fövqəlnova partlayışı, asteroidlər, kometlər və qara dəliklər tərəfindən parçalanan ulduzlar barədə məlumat toplayıb.