"Aina" ekranlı və coystikli ağıllı üzük təqdim edib: qiyməti 399 dollar

TechCrunch xəbər verir ki, aparat startapı "Aina" ekran, coystik və mikrofonla təchiz olunmuş ağıllı üzük təqdim edib. "AI ring" adlanan cihaz vasitəsilə istifadəçilər süni intellekt agentləri ilə danışa, qeyd götürə və daxili dinamik sayəsində zənglərə cavab verə bilərlər.

Şirkət üzüyü həm süni intellekt, həm də adi tətbiqlər üçün idarəetmə vasitəsi kimi təqdim edir. Mikrofon vasitəsilə xatırlatmalar qurmaq, agentlərə sorğu göndərmək və "Mac" kompüterində "Wispr Flow" və ya startapın öz diktə sistemi ilə mətn yazdırmaq mümkündür.

Ekranda telefondan gələn bildirişlər və idarə olunan tətbiqlər göstərilir. Coystik və jest dəstəyi ekrandakı tətbiqdən asılı olaraq müxtəlif əmrləri işə salmağa imkan verir. Üzüklə musiqini, eləcə də "Apple TV" kimi ağıllı ev cihazlarını idarə etmək olar. Şirkətin təsisçisi Apoorv Shankar bildirib ki, proaktiv agentlərlə ünsiyyət üçün telefon və noutbuk ekranlarından daha yaxşı interfeys lazımdır.

Üzük üçün əvvəlcədən sifarişlər 399 dollarlıq erkən qiymətlə qəbul olunur, bu dövr bitdikdən sonra qiymət 499 dollar olacaq. Cihazın göndərilməsinə 2027-ci ilin yanvarında başlanılması planlaşdırılır.

Qeyd edək ki, "Aina" iyul ayında 5,5 milyon dollar investisiya cəlb edib. Şirkət əvvəllər "Mac" üçün "Mirage" adlı üç düyməli kontroller buraxıb. Bazarda "Pebble Index 01", "Sandbar Stream", "Oasis" və "Natura" kimi oxşar funksiyalı ağıllı üzüklər də mövcuddur.