Engadget xəbər verir ki, "PHP Foundation" iki kritik boşluğu aradan qaldıran təhlükəsizlik yeniləməsi açıqladıqdan sonra Avropa İttifaqı ölkələrində və Kanadada bir sıra dövlət saytları ehtiyat tədbiri olaraq müvəqqəti fəaliyyətini dayandırıb.

"Reuters"in məlumatına görə, Niderland, Danimarka, Fransa və Finlandiya hökumətləri ən azı bəzi saytlarını əlçatmaz edib. Kanadanın süni intellekt və rəqəmsal innovasiya naziri Evan Solomon da "X" sosial şəbəkəsində saytların müvəqqəti bağlanması qərarını açıqlayıb və "PHP"dən istifadə edən bütün sayt operatorlarını tezliklə yeniləmə etməyə çağırıb.

Məlum olub ki, boşluqlar "PHP" proqram təminatında illərlə mövcud olub və yalnız kibertəhlükəsizlik şirkətlərinin istifadə etdiyi süni intellekt alətləri sayəsində üzə çıxıb. Onlar hakerə "PHP" ilə işləyən sistemə daxil olmağa və potensial olaraq onu ələ keçirməyə imkan verə bilər. "Drupal Association"ın müvəqqəti icraçı direktoru Tiffany Farriss bildirib ki, problem internetin böyük hissəsinə təsir edir.

ABŞ-da isə Kibertəhlükəsizlik və İnfrastruktur Təhlükəsizliyi Agentliyi (CISA) təşkilatları yeni yeniləməni quraşdırmağa çağırıb. Ağ Ev "Reuters"ə açıqlamasında problemdən cümə günü xəbər tutduğunu bildirib.

Qeyd edək ki, "PHP" veb saytlar üçün proqramlaşdırma dilidir və "WordPress", "Drupal" kimi məşhur veb nəşr platformalarında istifadə olunur. Farriss-in sözlərinə görə, son 20 ildə buraxılmış istənilən "PHP" versiyasından istifadə edən serverlər həssasdır.