Ars Technica xəbər verir ki, yeni hesabata görə, Ukraynada "Starlink" xidmətinin sürətinin məhdudlaşdırılması barədə qərarı İlon Mask özü verib, daha sonra isə məsuliyyəti ABŞ prezidenti Donald Trampın üzərinə atıb. Bu addım Ukrayna tərəfi üçün gözlənilməz olub.

ABŞ dövlət katibi Marko Rubio jurnalistlərə bildirib ki, prezidentin "Starlink" və "Starshield" ilə bağlı qərarlara aidiyyəti yoxdur. Onun sözlərinə görə, bu özəl şirkətdir və administrasiyanın yavaşlama barədə əvvəlcədən məlumatı olmayıb. Ağ Ev də xidmətin yavaşladılmadığını və hazırda işlək olduğunu açıqlayıb.

Rubio həmçinin Ukraynanın yalnız "Starlink"dən istifadə etdiyini, hərbi yönümlü "Starshield"ə isə çıxışının olmadığını iddia edib. Volodimir Zelenski isə ölkəsinin "Starshield"dən istifadə etdiyini və məhdudiyyətlərin tam aradan qaldırılmadığını bildirib. Onun sözlərinə görə, cəbhənin müxtəlif sektorlarında avadanlıq saatda 130–161 kilometr sürətdə işləməyi dayandırır.

"SpaceX" məsələ ilə bağlı hələlik açıqlama verməyib.

Qeyd edək ki, Mask "Starlink" terminallarını Ukraynaya ilk dəfə 2022-ci ilin fevralında göndərib. 2023-cü ildə "SpaceX" Ukraynanın hərbi dronlarda "Starlink"dən istifadəsini bloklayıb. 2024-cü ilin avqustunda isə şirkət Pentaqonla müqavilə əsasında daha 2 500 terminalın "Starshield" şəbəkəsinə qoşulmasına razılıq alıb, bundan əvvəl 500 terminal artıq qoşulmuşdu.