The Register xəbər verir ki, tədqiqatçı Paulos Yibelo "Linux KVM" hipervizorunda aşkarladığı kritik zəifliyi "PwnEscape" adlandırıb. CVE-2026-99999 kodunu alan boşluq 9.3 bal ilə qiymətləndirilib və qonaq virtual maşından host serverə çıxışa imkan verir.

Zəiflikdən istifadə üçün bir neçə qüsurlu IPv4 paketi göndərmək kifayətdir. Problem paketlərdəki yoxlama cəmi (checksum) metaməlumatları ilə bağlıdır: qonaq tərəfindən idarə olunan bu məlumatlar paket başlığı yoxlamadan keçdikdən sonra ona dəyişiklik edə bilir.

"Red Hat" şirkətinin hesabatına görə, boşluq hostda ixtiyari kodun icrasına, sistemin çökməsinə və ya həssas yaddaş məlumatlarının sızmasına səbəb ola bilər. Bu isə bir hostdakı minlərlə virtual maşına və konteynerə giriş riski deməkdir.

Yibelo hesab edir ki, "PwnEscape" Linux şəbəkə sistemində tamamilə yeni hücum sinfini üzə çıxarır. Onun sözlərinə görə, problem Linux-un müxtəlif hissələrinin eyni paketin fərqli versiyalarına etibar etməsindədir.

Qeyd edək ki, "AWS" öz "EC2" xidmətinin risk altında olmadığını bildirib, "Google Cloud" da çox güman ki, təhlükəsizdir. Linux nüvəsi üçün düzəliş hazırlanıb və "Debian", "RHEL", "Ubuntu" kimi distributivlərə əlavə olunur. "Edera" şirkətinin məlumatına görə, bu il Linux-da yeddi belə çıxış boşluğu tapılıb.