GSMArena xəbər verir ki, "Redmi" oktyabrın 26-da Çində təqdim olunacaq "Redmi K100" smartfonu haqqında yeni detallar açıqlayıb. Model avqustda nümayiş etdirilən "Redmi K100 Pro" və "K100 Pro Max" cihazlarına qoşulacaq.
Smartfonun arxa panelində iki kameralı modul yer alacaq. Əsas kamera 1/1.55 düym ölçülü, f/1.68 diafraqmalı 50 MP-lik "Light and Shadow Hunter 800" sensoru üzərində qurulub. Cihaz toz və suya qarşı IP68 qorunma standartı, eləcə də ekranaltı ultrasəs barmaq izi skaneri ilə təchiz olunacaq.
Şirkətin "Weibo" paylaşımına görə, "K100" simmetrik ikili dinamiklər, daha yaxşı bağlantı üçün yeddi antena və vibrasiya hissini gücləndirən 0815 X-oxlu xətti mühərrik alacaq.
Daha əvvəl "Redmi" smartfonun 10 000 mAh tutumlu batareya və 100 Vt naqilli şarj dəstəyi ilə gələcəyini təsdiqləyib. Cihaz 6,83 düymlük AMOLED ekrana malik olacaq.
Qeyd edək ki, "Redmi K100" üç rəngdə, o cümlədən yeni "Firefly Green" çalarında satışa çıxarılacaq. Smartfon üçün ilkin sifarişlər artıq Çində "Xiaomi"nin rəsmi saytı vasitəsilə qəbul olunur.
Mənbə: GSMArena
Bizi izləyin
Ən vacib texnologiya xəbərlərini sosial şəbəkələrdə qaçırmayın.
Növbəti xəbər
