GSMArena xəbər verir ki, "Apple" "Self Service Repair Store" platforması vasitəsilə "iPhone 18 Pro" və "iPhone 18 Pro Max" smartfonları üçün ehtiyat hissələri və təmir alətləri satmağa başlayıb. Siyahıya həmçinin "M5 Max" və "M5 Ultra" prosessorlu "Mac Studio", eləcə də "M6" və "M5 Pro" çipli "Mac mini" modellərinin hissələri əlavə olunub.

Yeni smartfonlar üçün arxa şüşə, batareya, dinamiklər, kameralar, ekran, korpus, ön kamera, ana plata, mikrofon, SIM yuvası və "Taptic Engine" kimi hissələr təklif edilir. Hər kateqoriyada təmir üçün lazım olan alətlər də göstərilib və onları ayrıca almaq mümkündür.

Apple "iPhone 18 Pro" üçün ehtiyat hissələrinin satışına başlayıb
GSMArena

Əvəzedici kamera 249 dollara satılır ki, bu da "iPhone 17 Pro" modelləri ilə eyni qiymətdir, halbuki yeni smartfonlarda dəyişkən diafraqma sistemi var. Köhnə kameranı qaytaranlara 59,76 dollar kredit verilir. Ekran "iPhone 18 Pro" üçün 329 dollar, "Pro Max" üçün isə 379 dollardır, lakin burada kredit cəmi 16,45 və 18,95 dollar təşkil edir.

Batareya hər iki model üçün 129 dollara satılır və 61,92 dollar kreditlə qiymət 67,08 dollara düşür, lakin "Pro Max" batareyası hələlik "tezliklə" statusundadır. Arxa şüşə 159 dollar, ön kamera isə 199 dollardır. Alət dəstinin yeddi günlük icarəsi 49 dollar təşkil edir.

Qeyd edək ki, "Apple" "Self Service Repair" proqramını 2022-ci ildə istifadəyə verib. Proqram uyğun regionlardakı istifadəçilərə ehtiyat hissələri almaq, alətləri almaq və ya icarəyə götürmək, həmçinin rəsmi təmir təlimatlarından istifadə etməklə cihazlarını özləri təmir etmək imkanı yaradır.