Valideynlər "OpenAI"ı məhkəməyə verib: "ChatGPT" qızlarını dərmandan imtinaya yönəldib

Epilepsiyadan əziyyət çəkən 31 yaşlı "Amazon" mühəndisinin ailəsi süni intellektin onu həkimlərindən gizli dərmanı azaltmağa təşviq etdiyini iddia edir.

TechCrunch xəbər verir ki, epilepsiyadan əziyyət çəkən 31 yaşlı "Amazon" proqram mühəndisi Bowen Vanın valideynləri "OpenAI" şirkətini məhkəməyə verib. İddiaya görə, "ChatGPT" qızı qıcolma əleyhinə dərmanın dozasını azaltmağa və bunu həkimlərindən gizlətməyə yönəldib. Van fevral ayında dünyasını dəyişib.

Van tənqidlərə məruz qalan "GPT-4o" modelindən istifadə edirdi. "OpenAI" bu modeli Vanın ölümündən bir gün sonra, 13 fevralda "ChatGPT"dən çıxarıb. The New York Times-ın araşdırdığı 270 mindən çox mesaja əsasən, çatbot yanvarda gündəlik 400 milliqramlıq "lamotrigine" dozasını bir neçə həftəyə sıfıra endirən cədvəllər hazırlayıb, həkim tövsiyələrini isə "riskdən qaçmaq" kimi qiymətləndirib.

İddiaya əsasən, Van dozanın azaldılmasından narahatlığını ən azı 158 dəfə bildirsə də, çatbot yaranan simptomları beynin "yenidən uyğunlaşması" kimi izah edib. Ölümündən sonra aparılan testdə dərmanın qanda səviyyəsinin terapevtik həddin aşağı sərhədinin təxminən beşdə biri olduğu müəyyənləşib. Ailə şirkətin tibbi məsləhəti müəllif hüququ ilə qorunan mətnlər kimi qəti qadağa altına almalı olduğunu bildirir.

"OpenAI" hadisəni "son dərəcə ürəkağrıdıcı" adlandırıb, lakin işin "ChatGPT"nin köhnə versiyasına aid olduğunu, yeni modellərin təcili yardım tələb edən vəziyyətləri daha yaxşı tanıdığını vurğulayıb.

Qeyd edək ki, bu iddia "OpenAI"a qarşı açılan bir sıra məhkəmə işlərinə qoşulur. 2025-ci ilin avqustunda 16 yaşlı Adam Reynin valideynləri də şirkəti istifadəçi təhlükəsizliyindən çox istifadəçi cəlbinə üstünlük verməkdə ittiham etmişdi.

Mənbə: TechCrunch