Tramp Atlantik okeanının adını dəyişmək üçün "Google" rəhbərinə zəng etdiyini deyib

ABŞ prezidentinin sözlərinə görə, Sundar Pichai bu dəfə xahişi rədd edib və okeanların bir çox ölkəni əhatə etdiyini əsas gətirib.

"Mashable" xəbər verir ki, ABŞ prezidenti Donald Tramp "Google" şirkətinin baş icraçı direktoru Sundar Pichaiyə zəng edərək Atlantik okeanının adının dəyişdirilməsini müzakirə etdiyini açıqlayıb. Tramp bu barədə Cənubi Karolinada keçirilən mitinqdə danışıb.

Prezidentin sözlərinə görə, "Google Maps" əvvəllər Meksika körfəzinin adını Amerika körfəzi, Ontario gölünün adını isə Amerika gölü kimi dəyişib. "Bizim gölümüz və körfəzimiz var, indi bir çay və bir okean lazımdır", deyə Tramp bildirib.

Trampın təqdim etdiyi versiyaya görə, Pichai bu dəfə təklifi qəbul etməyib və okeanların fərqli olduğunu, çoxlu ölkəni əhatə etdiyini vurğulayıb. Bundan sonra Tramp Atlantik okeanının adını dəyişmək fikrindən, ehtimal ki, imtina edəcəyini deyib, lakin Sakit okeanı "Amerika okeanı" adlandırmaq istədiyini əlavə edib.

Qeyd edək ki, "Google" hələlik prezidentlə belə bir telefon danışığının baş tutduğunu təsdiqləməyib. "Google Maps"də əvvəl edilmiş coğrafi ad dəyişiklikləri yalnız ABŞ-dakı istifadəçilər üçün göstərilir.

Mənbə: Mashable