"Spotify" podkastlar üçün pullu üzvlük sistemini istifadəyə verib

Podkast müəllifləri dinləyicilərə bonus kontent, daha az reklam və erkən giriş kimi imtiyazlar təklif edə biləcək.

TechCrunch xəbər verir ki, "Spotify" podkast müəllifləri üçün pullu üzvlük funksiyasını təqdim edib. Yeni sistem yaradıcılara ən sadiq dinləyicilərindən yalnız ödənişli bonus epizodlarla deyil, digər imtiyazlarla da gəlir əldə etməyə imkan verir.

Müəlliflər hansı üstünlükləri təklif edəcəklərini özləri seçə bilirlər: əlavə audio və ya video, daha az reklam, verilişlərə erkən giriş və ya bunların birləşməsi. Gəlirin 90 faizi yaradıcıda qalır, imtiyazlar isə müxtəlif səviyyələr və qiymətlər üzrə paketlənə bilər.

Funksiyadan yararlanmaq üçün podkast "Spotify for Creators" və ya "Megaphone" platformasında yerləşdirilməli, ən azı 100 saat dinlənmə, 100 dinləyici və ya izləyici və üç dərc olunmuş epizoda malik olmalıdır. Üzvlük tətbiqdaxili alış vasitəsilə deyil, veb üzərindən satın alınacaq.

Xidmət ABŞ daxil olmaqla dünyanın 34 bazarında istifadəyə verilir. İlk mərhələdə "Making Sense with Sam Harris", "Shawn Ryan Show" kimi verilişlər, eləcə də 12 şou ilə "YMH Studios" şəbəkəsi üzvlük təklif edəcək.

Qeyd edək ki, "Spotify" bu ideyanı ilk dəfə may ayında keçirilən İnvestor Günündə nümayiş etdirmişdi. Şirkət video sahəsində "YouTube" ilə rəqabəti gücləndirmək üçün platformanı podkast müəllifləri üçün daha cəlbedici etməyə çalışır və tezliklə üzvlük nişanları və salamlama klipləri əlavə edəcəyini bildirib.

Mənbə: TechCrunch