Rusiya ABŞ peykinə yaxınlaşan hərbi peykinin dinc məqsədli olduğunu bildirib

"Kosmos 2612" Finlandiyanın "ICEYE" şirkətinə məxsus radar peykinə yaxınlaşıb. Vaşinqton bunu orbitdə silah əməliyyatına bənzədib.

Ars Technica xəbər verir ki, Rusiyanın BMT-dəki nümayəndə heyəti rəhbərinin müavini Konstantin Vorontsov "Kosmos 2612" hərbi peykinin fəaliyyətinin "tamamilə dinc xarakter" daşıdığını bildirib. Bu açıqlama Rusiya peykinin ABŞ-da qeydiyyatdan keçmiş kommersiya peykinə təhlükəli məsafədə yaxınlaşmasından bir neçə gün sonra səslənib.

Vorontsov çıxışını BMT Baş Assambleyasının Birinci Komitəsində ABŞ Dövlət Departamentinin rəsmisi Brayan Hardestinin bəyanatından dərhal sonra edib. Hardesti "Kosmos 2612"nin Yerdən təxminən 550 kilometr hündürlükdə kommersiya peykinə qəsdən yaxınlaşdığını, bu davranışın orbitdə silah əməliyyatına uyğun göründüyünü və aşağı orbitdə təhlükəsizlik hədlərini pozduğunu deyib. ABŞ Dövlət katibinin silahlara nəzarət üzrə müavini Tomas DiNanno da "X" platformasında oxşar bəyanat paylaşıb.

Rusiyalı diplomat ABŞ və Avropa rəsmilərinin narahatlığını "əsassız" adlandırıb, Qərb ölkələrini Rusiyanın kosmik fəaliyyəti ilə bağlı "absurd ittihamlar" səsləndirməkdə günahlandırıb.

Qeyd edək ki, Vorontsov 2022-ci ildə Ukrayna ordusunun istifadə etdiyi Qərb peykləri də daxil olmaqla kommersiya kosmik infrastrukturunun "cavab zərbəsi üçün qanuni hədəf" ola biləcəyini bildirmişdi. Aprel ayında orbitə çıxarılan "Kosmos 2612" bir sıra manevrlərlə Finlandiyanın "ICEYE" şirkətinin ABŞ törəmə şirkətinə məxsus "ICEYE-X36" radar müşahidə peyki ilə eyni orbitə daxil olub.

Mənbə: Ars Technica