The Verge xəbər verir ki, ABŞ-ın Nyu-Meksiko ştatında hakim "Meta" şirkətinə ştatın ədalətsiz ticarət təcrübələri haqqında qanununu 43 milyondan çox dəfə pozduğuna görə 25 milyard dollar cərimə ödəməyi əmr edib. Bu, şirkətin bu il üzləşdiyi ən böyük hüquqi zərbə hesab olunur.

Sentyabrda münsiflər heyəti "Meta"nın istifadəçiləri məlumatlarının qorunması, həmçinin platformalarında dezinformasiya və nifrət nitqinin qarşısının alınması barədə çaşdırdığı qənaətinə gəlib. İş 2021-ci ildə Britaniyanın "Cambridge Analytica" siyasi konsaltinq şirkətinin milyonlarla "Facebook" hesabından məlumat topladığının üzə çıxmasından sonra qaldırılıb.

Hakim qanunla icazə verilən maksimum məbləği, hər pozuntu üçün 5 000 dolları tətbiq edib. Bu, ümumilikdə 219 milyard dollardan çox cərimə demək idi, lakin məbləğ 25 milyard dollara endirilib. Baş prokuror ofisinin sözlərinə görə, bu, ABŞ tarixində korporasiyaya qarşı tətbiq edilən ən böyük maliyyə cəzalarından biridir.

"Meta"nın baş hüquq məsləhətçisi C.J. Mahoney qərarın ştatda biznes aparmağı demək olar ki, qeyri-mümkün etdiyini bildirib və şirkətin apellyasiyada qalib gələcəyinə əmin olduğunu vurğulayıb. Nyu-Meksiko Baş prokuroru Raúl Torrez isə işin şirkətlərin istifadəçiləri şəxsi məlumatlarla bağlı aldatmasının nəticəsiz qalıb-qalmayacağı ilə bağlı olduğunu deyib.

Qeyd edək ki, "Meta" daha əvvəl Nyu-Meksikoda məhsullarının təhlükəsizliyi barədə ictimaiyyəti çaşdırdığına görə təxminən 1 milyard dollar ödəməyə məhkum edilib. Şirkət digər ştatların baş prokurorları ilə uşaqların onlayn təhlükəsizliyinə dair iddialar üzrə 17,1 milyard dollarlıq razılaşma da əldə edib.