Kompüter satışları kəskin azalıb: üçüncü rübdə 21 faiz düşüş qeydə alınıb

Analitiklər geriləməni operativ yaddaş, SSD və prosessorların bahalaşması ilə əlaqələndirir, bazarın tezliklə bərpası gözlənilmir.

The Verge xəbər verir ki, "Counterpoint Research" şirkətinin hesabatına görə, 2026-cı ilin üçüncü rübündə dünya üzrə fərdi kompüter göndərişləri ötən ilin eyni dövrü ilə müqayisədə 21 faiz azalıb. Bu göstərici daha əvvəl "IDC" və "Omdia" tərəfindən açıqlanan məlumatlarla üst-üstə düşür.

Hesabatda azalmanın əsas səbəbi kimi komponentlərin bahalaşması göstərilib. Son aylarda operativ yaddaş, SSD yaddaşlar, eləcə də "Intel", "AMD" və "Qualcomm" prosessorlarının qiyməti artıb. Bu isə "MacBook"dan tutmuş "Raspberry Pi"yə qədər müxtəlif cihazların bahalaşmasına səbəb olub.

Şirkətin baş analitiki Minsoo Kang bildirib ki, bəzi istehsalçılar xərc artımını daha asan qarşılayan konfiqurasiyalara üstünlük verir, bu da büdcəli alıcılar üçün seçimləri azaldır. Bəzi şirkətlər qiymət artımını yumşaltmaq üçün "DDR4" yaddaş və 4 GB yaddaşlı videokartlar kimi köhnə texnologiyalara yenidən müraciət edib.

"Counterpoint" həmçinin qeyd edib ki, 2025-ci ilin üçüncü rübündə "Windows 10" dəstəyinin başa çatmasından əvvəl edilən alışlar və tariflərlə bağlı ehtiyat yığımı müqayisədə düşüşü daha kəskin göstərib. Şirkət dördüncü rübdə göndərişlərin 27 faiz azalacağını, 2027-ci ildə isə bazarın təxminən sabit qalacağını proqnozlaşdırır.

Qeyd edək ki, kompüter göndərişləri 2026-cı ilin ikinci rübünə qədər iki ildən artıq fasiləsiz artım nümayiş etdirib. Eyni rübdə smartfon göndərişləri də son 14 ilin ən aşağı səviyyəsinə enib.

Mənbə: The Verge