# Harvard Universitetində məlumat sızması: 851 min hesabın məlumatları ifşa olunub

> Xakerlərin məzunlar və ianə sistemlərindən oğurladığı məlumatlar "ShinyHunters" qrupu tərəfindən dark vebdə yayılıb.

- Mənbə: [INPUT.AZ](https://input.az)
- URL: https://input.az/xeberler/harvard-universitetinde-melumat-sizmasi-851-min-hesabin-melumatlari-ifsa-olunub
- Dərc olunub: 3 noyabr 2026, 15:02 (Bakı)
- Bölmə: Xəbərlər
- Teqlər: Kibertəhlükəsizlik, Məlumat sızması, Harvard
- Mənbə: [BleepingComputer](https://bleepingcomputer.com/news/security/harvard-university-data-breach-exposed-info-of-851-000-accounts)

![Harvard Universitetində məlumat sızması: 851 min hesabın məlumatları ifşa olunub](https://inputaz.s3.eu-central-1.amazonaws.com/media/9269f0804e466278-1600x900.webp)
_BleepingComputer_

BleepingComputer xəbər verir ki, 2025-ci ilin noyabrında "Harvard" Universitetinin Məzunlar və İnkişaf işləri sistemlərinə hücum edən xakerlər 850 mindən çox unikal e-poçt ünvanı ilə bağlı məlumatları oğurlayıb. Bu barədə məlumat sızmalarını izləyən "Have I Been Pwned" xidməti açıqlayıb.

Universitet hücumu 18 noyabr 2025-ci ildə aşkarlayıb. Hücumçular tələbələrin, məzunların, ianəçilərin və əməkdaşların e-poçt ünvanları, telefon nömrələri, ev və iş ünvanları, tədbirlərdə iştirak qeydləri və ianə detallarına çıxış əldə edib. Universitetin informasiya texnologiyaları üzrə rəhbəri Klara Jelinkova isə sistemlərdə sosial təminat nömrələri, parollar və ödəniş kartı məlumatlarının saxlanılmadığını bildirib.

![Harvard Universitetində məlumat sızması: 851 min hesabın məlumatları ifşa olunub](https://inputaz.s3.eu-central-1.amazonaws.com/media/baef25479ca9c2d3.webp)
_BleepingComputer_

"Harvard" hücumu konkret qrupla əlaqələndirməsə də, "ShinyHunters" qrupu məsuliyyəti üzərinə götürüb və 1 milyondan çox qeyd oğurladığını iddia edib. Universitet fidyə ödəməkdən imtina etdikdən sonra qrup fevralın əvvəlində 1,1 GB həcmində arxivi dark vebdəki saytında yayımlayıb.

"Have I Been Pwned" sızan məlumatları təhlil edərək 850 500 hesabın ad, doğum tarixi, ünvan və sosial şəbəkə profilləri kimi məlumatlarının ifşa olunduğunu təsdiqləyib.

![Harvard Universitetində məlumat sızması: 851 min hesabın məlumatları ifşa olunub](https://inputaz.s3.eu-central-1.amazonaws.com/media/c84e51d78529148e.webp)
_BleepingComputer_

Qeyd edək ki, 2025-ci ilin noyabrında digər iki "Ivy League" universiteti, "Princeton" və Pensilvaniya Universiteti də ianəçi məlumatlarının sızdığını açıqlamışdı. Bundan əlavə, oktyabrda "Harvard" "Clop" qrupunun "Oracle E-Business Suite" boşluğu vasitəsilə həyata keçirdiyi ehtimal olunan ikinci hücumu araşdırdığını bildirmişdi.