Cənubi Koreya "Apple"ı 15,5 milyon dollar cərimələyib: "App Store" qaydaları dəyişəcək

Tənzimləyici "Apple" və "Google"dan ödəniş üsulları və tətbiqlərin yoxlanması prosedurlarını yenidən nəzərdən keçirməyi tələb edib.

9to5Mac xəbər verir ki, Cənubi Koreyanın Media və Kommunikasiya Komissiyası (KMCC) tətbiq ödənişləri ilə bağlı praktikalara görə "Apple" və "Google" şirkətlərini cərimələyib. "Apple"a 20,81 milyard von, yəni təxminən 15,5 milyon dollar cərimə tətbiq olunub.

Komissiyanın qərarı üç pozuntuya əsaslanır: müəyyən ödəniş üsulunun məcburi tətbiqi, tətbiqlərin yoxlanmasının əsassız gecikdirilməsi və ayrı-seçkilik yaradan komissiya. KMCC-nin sözlərinə görə, şirkətlər 26 faizlik komissiya və alternativ sistemlərə əlavə məhdudiyyətlər qoyaraq tərtibatçıları öz daxili ödəniş sistemlərindən istifadəyə faktiki olaraq məcbur ediblər. İndi hər iki şirkət xarici ödəniş üsullarına icazə verməli və yoxlama prosedurlarını yeniləməlidir.

Yalnız "Apple"a aid pozuntu isə komissiyanın hesablanması ilə bağlıdır. 2015-ci ilin iyulundan 2023-cü ilin yanvarınadək şirkət 30 faizlik komissiyanı xarici tərtibatçılar üçün ƏDV-siz, Cənubi Koreya tərtibatçıları üçün isə ƏDV daxil qiymət əsasında hesablayıb. Reuters-ə görə, "Apple" qərarla razılaşmadığını və yerli qanunlara uyğun seçimləri dəyərləndirdiyini bildirib.

Qeyd edək ki, bu, Cənubi Koreyada 2021-ci ildə Telekommunikasiya Biznesi Qanununa edilmiş və tətbiq bazarı operatorları üçün qadağan olunmuş hərəkətləri müəyyənləşdirən düzəliş əsasında ilk icra işidir. "Apple" bundan əvvəl Braziliya və Yaponiyada yerli rəqabət qaydalarına cavab olaraq alternativ tətbiq yayımı və ödəniş seçimləri təqdim edib, Avropa İttifaqında isə "App Store" ödənişlərini və biznes şərtlərini yeniləyib.

Mənbə: 9to5Mac