Britaniyalı deputat Jess Asato deepfake görüntülərə görə xAI-ı məhkəməyə verir

Leyborist deputat "Grok" vasitəsilə yaradılan saxta görüntülərinin icazəsiz istifadə edildiyini bildirib. Şirkət açıqlama verməyib.

"Wired" xəbər verir ki, Böyük Britaniyanın Leyborist Partiyasından olan parlament üzvü Jess Asato İlon Maskın "xAI" şirkətinə qarşı hüquqi proses başladıb. Deputat şirkətin onun təsvirindən razılığı olmadan qanunsuz istifadə etdiyini iddia edir.

Asato "Grok" çatbotu ilə qadın və uşaqların seksual xarakterli saxta görüntülərinin yaradılması ilə bağlı qalmaqal zamanı Maskı tənqid edib. Bundan sonra onun özünün də deepfake görüntüləri sosial şəbəkədə geniş yayılıb. Onların arasında deputatı bikinidə, hamilə və nasist simvolları ilə göstərən təsvirlər, eləcə də cinsi zorakılığa işarə edən video olub.

Deputatın sözlərinə görə, o, görüntülərdən "X" platformasına dəfələrlə şikayət edib, lakin hər dəfə onların qaydaları pozmadığı bildirilib. Yalnız vəkilin platformaya göndərdiyi rəsmi məktubdan sonra materiallar silinib. Vəkil həmçinin "xAI"-ın qanunu pozduğunu və iddia üçün əsas olduğunu bildirib.

Asato bu işin süni intellekt şirkətlərinin məhsullarının vurduğu zərərə görə məsuliyyət daşıması baxımından presedent yarada biləcəyini düşünür. "Heç kim qanundan böyük deyil", - deyə deputat vurğulayıb. "xAI" isə "Wired"-in şərh sorğusuna dərhal cavab verməyib.

Qeyd edək ki, "Grok" qalmaqalından sonra Britaniya hökuməti "Crime and Policing Act" qanunu ilə şəkildəki insanı "soyunduran" tətbiqlərin qadağan edilməsini sürətləndirib. Həmin qanunla süni intellekt çatbotları da Onlayn Təhlükəsizlik Aktının əhatəsinə salınıb, lakin müddəalar hələ qüvvəyə minməyib.

Mənbə: Wired