Avstraliya məhkəməsi "Apple"i alternativ tətbiq mağazalarına icazə verməyə məcbur edib

"Epic Games" ilə illərdir davam edən antiinhisar mübarizəsi Avstraliyada qərarla nəticələnib. "Apple" qərardan şikayət edəcəyini bildirib.

9to5Mac xəbər verir ki, Avstraliya federal məhkəməsi "Apple"ə "App Store" qaydalarında geniş dəyişikliklər etməyi əmr edib. 235 səhifəlik qərara əsasən, 2027-ci il martın 1-dən Avstraliya hesabı olan "iPhone" istifadəçiləri tətbiqləri üçüncü tərəf mağazalarından və saytlardan quraşdıra biləcək. Şirkət fevralın 15-dək müddətin 2027-ci il mayın 3-dək uzadılmasını tələb edə bilər.

Hakim Conatan Bic qərarında "Apple"in "iOS" tətbiqlərinin yayılması və tətbiqdaxili ödənişlər bazarında əhəmiyyətli gücə malik olduğunu və bundan rəqabəti məhdudlaşdırmaq üçün istifadə etdiyini bildirib. Məhkəmə şirkəti alternativ ödəniş sistemlərinə, xarici ödəniş keçidlərinə icazə verməyə və alternativ yayım üçün lazım olan tərtibatçı alətlərini təqdim etməyə məcbur edib.

Bundan əlavə, "Fortnite" və digər "Epic Games" tətbiqlərinin Avstraliya "App Store"una qaytarılması əmr olunub və bu tələb dərhal qüvvəyə minir. "Epic" oyunun ertəsi gün mağazaya qayıdacağını təsdiqləyib. "Apple" isə "Epic"in ilkin məhkəmə xərclərinin 85 faizini ödəməlidir.

Hakim "Epic"in qərarın bütün dünyaya şamil edilməsi tələbini rədd edib, "Apple"ə isə App Store xaricində yayılan tətbiqlər üçün təhlükəsizlik yoxlaması və notarizasiya tələblərini saxlamağa icazə verib. "Apple" "Reuters"ə açıqlamasında qərarın icrasının dayandırılmasını tələb edəcəyini və şikayət verəcəyini bildirib.

Qeyd edək ki, bu qərar keçən il məhkəmənin "Apple"in Avstraliya rəqabət qanununu pozduğunu müəyyən etməsindən sonra verilib. Mübahisə 2020-ci ildə "Fortnite"ın "App Store"dan çıxarılması və "Epic"in tərtibatçı hesabının bağlanması ilə başlamışdı.

Mənbə: 9to5Mac