The Verge xəbər verir ki, "Apple" bu ay ikinci məhsul təqdimatı üçün dəvətnamələr göndərib. Tədbir oktyabrın 28-də Los-Ancelesdə, Şərq vaxtı ilə saat 13:00-da keçiriləcək.

"Bloomberg"in məlumatına görə, şirkət tədbirdə yeni "Mac" kompüterləri və yenilənmiş "iPad Mini" planşetini təqdim edəcək. Əsas yeniliyin sensor OLED ekranlı, daha yüngül və "iPhone"dakı kimi "Dynamic Island" funksiyası olan yeni "MacBook Pro" olacağı gözlənilir.

Bundan başqa, "Apple"ın 14 düymlük "MacBook Pro" və "M6" prosessoru ilə işləyən yeni "iMac" təqdim edəcəyi bildirilir. "iPad Mini" isə nəhayət OLED ekran alacaq, ön kamerası planşetin üfüqi tərəfinə yerləşdiriləcək.

Şirkətin marketinq üzrə baş vitse-prezidenti Qreq Cozviak "X" sosial şəbəkəsində paylaşdığı tizerdə tədbirə işarə edərək "Gələn həftə "pro" danışmağa səbirsizlənirik" yazıb.

Qeyd edək ki, "M6" prosessoru bu yaxınlarda yeni "Mac Mini" ilə birlikdə təqdim olunub. Oktyabrın 28-dəki tədbir "Apple"ın bu ay keçirdiyi ikinci məhsul təqdimatı olacaq.