"App Store"dakı saxta kripto tətbiqi 27 pul kisəsindən 23 min dollar oğurlayıb

"Padre Terminal" adlı saxta tətbiq istifadəçilərin şəxsi açarlarını ələ keçirərək "Solana" pul kisələrini boşaldıb.

BleepingComputer xəbər verir ki, "Apple"ın "App Store" mağazasında yayılan "Padre Terminal" adlı saxta kriptovalyuta ticarəti tətbiqi 27 "Solana" pul kisəsindən təxminən 23 min dollarlıq vəsaitin oğurlanması ilə əlaqələndirilib. Tətbiq istifadəçilər şəxsi açarlarını ona daxil etdikdən sonra pul kisələrini boşaldıb.

Blokçeyn tədqiqatçısı Iris bildirib ki, əsl "Padre" xidməti, hazırda "Terminal by pump.fun" adlanan platforma, yalnız veb versiyada fəaliyyət göstərir. Buna görə onu təqlid edən istənilən mobil tətbiq zərərli hesab olunur. Saxta tətbiq artıq "App Store"dan silinib, lakin oğurluqlar ondan sonra da davam edib: sonuncu hadisə 29 oktyabrda qeydə alınıb.

Tədqiqatçının sözlərinə görə, hücumçu qalan 4070 "USDC" tokenini "SOL"a çevirib ki, "Circle" şirkəti vəsaiti dondura bilməsin. Daha sonra 192 "SOL" yeni pul kisəsinə köçürülüb. Iris mağazada daha dörd şübhəli tətbiq də aşkarlayıb: "Axiom Pro: Focus", "GMGN AI", "HyperTerminal-HyperliquidTools" və "Pump Fun Tokens & Analitycs". Onların rəylərində istifadəçilər vəsaitlərinin oğurlandığını iddia edib, lakin bu hallar müstəqil təsdiqlənməyib.

Mütəxəssislər istifadəçilərə tətbiqləri yalnız layihələrin rəsmi saytlarındakı keçidlər vasitəsilə yükləməyi, az yükləmə və rəyi olan, eləcə də adı layihə ilə əlaqəsiz görünən nəşriyyatçıların tətbiqlərindən uzaq durmağı tövsiyə edir.

Qeyd edək ki, 2024-cü ilin martında da "App Store"da saxta "Leather" kripto pul kisəsi tətbiqi peyda olmuşdu. "Apple" həmin tətbiqi iki həftə sonra silmiş və nəşriyyatçını tərtibatçı proqramından kənarlaşdırmışdı.

Mənbə: BleepingComputer