"INMO GO3" ağıllı eynəyi ekran, "Gemini" dəstəyi və kamera pərdəsi ilə satışa çıxıb

58 qram çəkisi olan eynək 98 dildə real vaxt tərcümə, naviqasiya və dəyişdirilə bilən batareya təklif edir. Qiyməti 509 dollardır.

9to5Google xəbər verir ki, "INMO" şirkəti hər göz üçün ayrıca ekranı olan "INMO GO3" ağıllı eynəyini satışa çıxarıb. Cihaz "Google"un "Gemini" və "OpenAI"ın "ChatGPT" süni intellekt modelləri ilə işləyir, qiyməti isə 509 dollardır.

Eynəkdə parlaqlığı 1500 nitə çatan və 30 dərəcəlik görüş sahəsinə malik "MicroLED" ekranlar quraşdırılıb. Onların vasitəsilə istifadəçi smartfona baxmadan real vaxt tərcüməsini, naviqasiya göstərişlərini, suflyor mətnini və süni intellekt köməkçisinin cavablarını görə bilir. Tərcümə funksiyası 98 dili dəstəkləyir, onlardan 13-ü tam oflayn rejimdə işləyir. Eynək həmçinin görüşlər zamanı qeydlər apara bilir, tezliklə isə xülasələri də ekranda göstərəcək.

Cihazın çəkisi 58 qramdır və bu, ekransız "Ray-Ban Meta" eynəyindən bir qədər çoxdur. Batareya dəyişdirilə bilən formada hazırlanıb: enerji bitdikdə onu əvvəlcədən doldurulmuş digər batareya ilə əvəz etmək mümkündür. Kameranın üzərində isə onun istifadə olunmadığını göstərən fiziki pərdə yerləşdirilib.

Əlavə aksessuarlar sırasında tərcümə zamanı istifadəçinin səsinin süni intellekt surəti ilə qarşı tərəfə cavab verən dinamik, eynəyi idarə etmək üçün üzük, günəş eynəyi üçün örtük və resept linzaları üçün əlavələr var.

Qeyd edək ki, bazardakı ağıllı eynəklərin əksəriyyətində ekran olmur, kamera isə məxfilik baxımından tez-tez narahatlıq yaradır. "INMO GO3" hər iki məsələyə həll təklif edən modellərdən biri kimi təqdim olunur.

Mənbə: 9to5Google