Windows Server yeniləməsi bəzi Exchange sistemlərində "Outlook"a girişi pozub

"Microsoft" problem üçün hələlik daimi həll təqdim etməyib, lakin müvəqqəti çıxış yolu açıqlayıb.

Mashable xəbər verir ki, "Microsoft"un Windows Server üçün buraxdığı yeni təhlükəsizlik yeniləməsi bəzi "Exchange Server" sistemlərində "Outlook"a girişlə bağlı problemlərə səbəb olub. Bu barədə şirkətin təhlükəsizlik qeydində məlumat verilib, həmin qeydə "BleepingComputer" nəşri də istinad edib.

"Microsoft"un açıqlamasına görə, problem Windows Server 2019 və daha yeni versiyalarla işləyən sistemlərə təsir edir. Nəticədə istifadəçilər "Outlook"a daxil ola bilməyə bilər, göndərilən məktublar isə ünvana çatmadan "Göndərilənlər qutusu"nda (outbox) qalır.

Şirkət bildirib ki, problemin ciddiliyi serverdən serverə dəyişir, bəzi sistemlərdə isə ümumiyyətlə nasazlıq müşahidə olunmur. "Microsoft" istifadəçilərə problemli yeniləməni silməməyi tövsiyə edib.

Daimi həll hələ hazır olmadığından şirkət müvəqqəti üsul təklif edib: "Exchange Server"də administrator hüquqları ilə əmr sətri açılmalı, reyestrə "EpmapSavedContextCap" parametrini əlavə edən xüsusi əmr daxil edilməli və server yenidən başladılmalıdır.

Qeyd edək ki, "Microsoft" bu müvəqqəti həllin uzunmüddətli düzəliş buraxılana qədər problemi yüngülləşdirəcəyini bildirib. Şirkət hələlik daimi yeniləmənin nə vaxt təqdim olunacağını açıqlamayıb.

Mənbə: Mashable