"Windows 11" 8 GB operativ yaddaşlı kompüterlərdə 40 faizədək sürətlənib

"Microsoft" yaddaş sıxılması və tətbiqlərin optimallaşdırılması ilə zəif kompüterlərdə performansı artıran yeniləmə yayımlayıb.

The Verge xəbər verir ki, "Microsoft" 8 GB operativ yaddaşa malik kompüterlər üçün "Windows 11" əməliyyat sisteminə yeni yeniləmə təqdim edib. Şirkətin laboratoriya testlərinə görə, belə cihazlarda sistem 20 faizədək daha cəld reaksiya verir, çoxtapşırıqlı iş rejimi isə 40 faizədək sürətlənib.

"Windows" bölməsinin rəhbəri Pavan Davuluri bildirib ki, əsas irəliləyiş yaddaşın sıxılması hesabına əldə olunub. Nəticədə sistem 2 GB-a qədər aktiv məlumatı daha yavaş yaddaş qurğusuna köçürmədən operativ yaddaşda saxlaya bilir. Bu, açıq qalmış tətbiq və ya brauzer vərəqinin yenidən yüklənməsi ehtimalını azaldır.

Bundan başqa, "Windows", "Edge" və "Microsoft 365" tətbiqlərində edilən dəyişikliklər yaddaş istifadəsinin artımını 900 MB-a qədər azaldıb. Təkcə "Word", "PowerPoint", "Excel" və "Outlook" üzrə qənaət 360 MB təşkil edir. Vidjetlər artıq panel açılana qədər yüklənmir ki, bu da təxminən 200 MB qənaət deməkdir. "Edge" brauzerində isə aktiv olmayan vərəqlər 15 dəqiqədən sonra yuxu rejiminə keçir.

Şirkət yaxın aylarda yaddaş sıxılmasını daha səmərəli etməyi, vidjetlər və axtarış kimi funksiyaların vahid veb mühərrikdən istifadəsini planlaşdırır. "Microsoft" həmçinin kompüter və çip istehsalçıları ilə birlikdə avadanlıq üçün ayrılan yaddaş həcmini optimallaşdırmaq üzərində işləyir.

Qeyd edək ki, "Microsoft" son bir ildə "Windows 11"in yaddaş istifadəsini və performansını yaxşılaşdırmaq üzərində çalışır. Şirkət ötən ay da sistemin 8 GB operativ yaddaşlı kompüterlərdə daha cəld işlədiyini açıqlamışdı.

Mənbə: The Verge