"Meta" "Tamagotchi"yə bənzəyən süni intellektli virtual ev heyvanı tətbiqi buraxıb

"Waddle World" adlı oyun gündəlik yazmağı virtual heyvana qulluqla birləşdirir, hələlik yalnız Filippində əlçatandır.

Engadget xəbər verir ki, "Meta" süni intellektlə işləyən və "Tamagotchi"ni xatırladan "Waddle World" adlı virtual ev heyvanı oyunu təqdim edib. Tətbiq hazırda yalnız Filippində istifadəçilər üçün əlçatandır.

Oyunda istifadəçi yumurtadan çıxan heyvanı yemləyir və onunla oynayır. Ənənəvi virtual heyvan oyunlarından fərqli olaraq, bu heyvan istifadəçi ilə söhbət edə və yazışmalar əsasında illüstrasiyalı gündəlik qeydləri yarada bilir. "Meta" 16-bit üslubunda hazırlanmış oyunu "ev heyvanı qiyafəsində gündəlik" kimi təsvir edir.

İstifadəçi gündəlik qeydini yaza və ya səslə diktə edə bilir, heyvan isə "Meta"nın süni intellekti vasitəsilə cavab yazaraq kiçik rəsm çəkir. Sosial media məsləhətçisi Matt Navarra tətbiqi "Tamagotchi" ilə "ChatGPT"nin birləşməsi adlandırıb. "App Store" və "Google Play" səhifələrinə görə, oyun sentyabrın sonunda yayımlanıb.

Tətbiqdə həmçinin xal toplamaq üçün mini-oyunlar var: məhsulları heyvanın başına yığmaq, düşən ulduzları tutub bombalardan qaçmaq və qarışıq hərflərdən söz düzəltmək. Toplanan xallarla heyvana yemək və oyuncaq almaq mümkündür. Məhdud əlçatanlığın səbəbi açıqlanmasa da, şirkətin tətbiqi geniş yayımdan əvvəl sınaqdan keçirdiyi ehtimal olunur.

Qeyd edək ki, "Meta" sentyabrda keçirdiyi "Connect" tədbirində "Muse Charm" adlı yumurta formalı süni intellekt yoldaşı cihazını da təqdim edib. Açarlıq ölçüsündə olan cihazın dekabrda bayramlar ərəfəsində satışa çıxarılması planlaşdırılır.

Mənbə: Engadget