"Google Maps" naviqasiya zamanı yol boyunca payız rənglərini göstərir

Yeni vizual funksiya ABŞ-ın bəzi şəhərlərində noyabrın sonunadək əlçatan olacaq.

9to5Google xəbər verir ki, "Google Maps" xidməti naviqasiya marşrutu boyunca payız yarpaqlarının rənglərini göstərən yeniləmə təqdim etməyə başlayıb. Funksiya sayəsində yol kənarındakı ağaclar xəritədə narıncı çalarlarla əks olunur.

Yenilik ABŞ-ın "uyğun metropoliten ərazilərində" noyabrın sonunadək əlçatan olacaq. Bununla belə, "Google" funksiyanın konkret olaraq hansı şəhərlərdə işlədiyini açıqlamayıb. Şirkətin nümayiş etdirdiyi nümunə videoda Boston şəhəri göstərilib.

Nəşrin müşahidələrinə görə, payız rəngləri yalnız naviqasiya rejimi aktiv olduqda görünür. Bostonun xəritəsinə naviqasiya rejimindən kənar baxdıqda bu effekt müşahidə edilməyib.

Qeyd edək ki, funksiya hələlik bütün istifadəçilər üçün əlçatan deyil və yalnız ABŞ-ın müəyyən şəhərlərini əhatə edir. Bu, "Google Maps"in əsasən vizual xarakter daşıyan mövsümi yeniləmələrindən biridir.

Mənbə: 9to5Google