Google DeepMind daha real fizika təklif edən "Genie 4" dünya modelini təqdim edib

Yeni model virtual mühitləri real vaxtda yaradır, simulyasiyanı idarə etmək üçün "Gemini 3.8 Flash" agentindən istifadə edir.

Ars Technica xəbər verir ki, "Google DeepMind" "Genie 4" adlı yeni dünya modelini təqdim edib. Şirkətin sözlərinə görə, model ötən il təqdim olunan "Genie 3" ilə müqayisədə demək olar ki, bütün istiqamətlərdə təkmilləşdirilib, xüsusilə fizikanın simulyasiyası daha dəqiq olub.

Dünya modeli əvvəlcədən hazırlanmış mühitə və ya proqramlaşdırılmış interaktiv elementlərə ehtiyac duymadan virtual dünya yaradır. İstifadəçi nə istədiyini yazır, model isə mühiti o, araşdırıldıqca real vaxtda kadr-kadr generasiya edir. "DeepMind" bu texnologiyanı ümumi süni intellektə (AGI) doğru yolda əsas elementlərdən biri hesab edir.

"Genie 4" məqsədləri hissələrə bölmək və hər kadrı qiymətləndirmək üçün "Gemini 3.8 Flash" modelindən yönləndirici agent kimi istifadə edir. Bu, simulyasiyanın ilkin kontekstdən uzaqlaşmamasına kömək edir. Bununla belə, şirkət etiraf edir ki, yaradılan dünyalar hələ də yalnız bir neçə dəqiqə ardıcıl qalır.

Əvvəlki versiyada olduğu kimi, istifadəçi simulyasiya zamanı parametrləri dəyişə bilir: havanı dəyişmək, yeni elementlər əlavə etmək və ya kameranı hərəkət etdirmək mümkündür. "DeepMind" texnologiyanın robotlar üçün sonsuz təlim mühitləri yaratmaqda və yaradıcı sahələrdə sürətli prototipləşdirmədə istifadə oluna biləcəyini bildirib.

Qeyd edək ki, "Genie 3"-ün təqdimatı oyun şirkətlərinin səhmlərinin ucuzlaşmasına səbəb olmuşdu. Ars Technica-nın yazdığına görə, "Genie 4" yaxın gələcəkdə ödənişli şəkildə istifadəçilər üçün əlçatan ola bilər.

Mənbə: Ars Technica