The Verge xəbər verir ki, çantaya taxılan, süni intellektlə danışa bilən kiçik "Eiliko" robotunun istehsalçısı "Energize Lab" nəşrin araşdırmasından sonra sistemlərini yoxlamaq üçün müstəqil təhlükəsizlik şirkəti cəlb edəcəyini açıqlayıb. Daha əvvəl hakerlərin istifadəçilərin oyuncaqla bütün söhbətlərinin mətnini asanlıqla oxuya bildiyi məlum olmuşdu.

The Verge və təhlükəsizlik tədqiqatçısı Sammy Azdoufal bir aydan artıq şirkətlə əlaqə saxlamağa çalışıb, lakin cavab ala bilməyiblər. Şirkətin texniki direktoru Du Xiaoyu-ya aid edilən bəyanatda əsas problemlərin təsdiqləndiyi, kənar girişin bağlandığı və robotların cavablarını uzaqdan dəyişməyə imkan verən interfeysin söndürüldüyü bildirilib.

"Energize Lab" həmçinin söhbət qeydlərini və onlar əsasında yaradılan istifadəçi profillərini artıq saxlamayacağını, mövcud məlumatları, o cümlədən avatar şəkillərini siləcəyini vəd edib. Uzunmüddətli yaddaş və fərdi avatar funksiyaları yalnız yoxlama başa çatdıqdan sonra geri qaytarılacaq.

Lakin The Verge bəyanat göndərilən vaxt şirkətin müştərilərin səs yazılarını və fotolarını heç bir qorunması olmayan açıq veb ünvanlarda saxlamaqda davam etdiyini təsdiqləyib. Azdoufal isə robotlara hələ də tam SSH girişinin olduğunu və nəzəri olaraq söhbətləri oxuyub oyuncağın davranışını dəyişə biləcəyini bildirib.

Qeyd edək ki, "Eiliko" istifadəçilərə "sirləriniz məndə təhlükəsizdir" deyə müraciət edirdi. Şirkət təhlükəsizlik məsələləri üçün ayrıca elektron poçt ünvanı yaradıb və yoxlamanın nəticələri barədə məlumat verəcəyini bildirib.