"Chrome" brauzerinin avtomatik doldurma funksiyası "Gmail"dən məlumat götürəcək

Yenilənmiş funksiya izləmə nömrəsi, uçuş bronu və sifariş nömrəsi kimi detalları formalara avtomatik təklif edəcək.

The Verge xəbər verir ki, "Google" şirkəti "Chrome" brauzerinin təkmilləşdirilmiş avtomatik doldurma funksiyasını genişləndirib. Artıq funksiya "Personal Intelligence" ilə işləyən "Gemini" vasitəsilə istifadəçinin "Gmail" poçtundakı məlumatları formalarda təklif edə biləcək.

Yeni imkan sayəsində istifadəçilər təsdiq məktublarını, qəbzləri və ya çatdırılma bildirişlərini özləri axtarmalı olmayacaq. Funksiya göndərişin izləmə nömrəsini, uçuş bronu nömrəsi və ya otel rezervasiyası kimi səyahət detallarını, həmçinin son alışın sifariş nömrəsini tapıb təklif edə bilir.

Şirkətin bildirdiyinə görə, forma doldurularkən təklif kimi göstərilən həssas məlumatlar şifrəli qalır. İstifadəçilər funksiyanın hansı məlumatlara çıxışı olduğunu "Chrome" ayarlarından idarə edə və ya onu tamamilə söndürə bilərlər.

Yenilik bu gündən ABŞ-da tətbiq olunmağa başlayıb. O, brauzerin masaüstü, "Android" və "iOS" versiyalarında "Personal Intelligence" funksiyasını aktivləşdirmiş istifadəçilər üçün "Chrome"dakı "Gemini" vasitəsilə əlçatan olacaq.

Qeyd edək ki, ötən il "Chrome"un təkmilləşdirilmiş avtomatik doldurma funksiyası artıq istifadəçinin adını, pasport nömrəsini, e-poçt və fiziki ünvanlarını "Google" hesabı və "Google Wallet" kimi xidmətlərdən götürərək doldurmağı öyrənmişdi.

Mənbə: The Verge