Wired xəbər verir ki, "Microsoft" "Xbox" konsolları üçün "Disc to Digital" funksiyasını bütün istifadəçilər üçün əlçatan edib. Alət fiziki "Xbox One" və "Xbox Series X" oyunlarının rəqəmsal lisenziyasını istifadəçinin hesabına bağlayır. Bir aylıq "Xbox Insider" beta sınağından sonra funksiya istifadəyə verilib və "Xbox Game Pass" abunəsi tələb etmir.

Lisenziyanı əldə etmək üçün diski konsola daxil edib ana ekranda oyunun üzərində menyu düyməsini basmaq və "Claim Digital License" seçimini etmək lazımdır. Bundan sonra oyunu disk olmadan quraşdırıb oynamaq mümkündür. Funksiya disk sürücüsü olan "Xbox One" konsollarında da işləyir, bu isə köhnə disklərin yeni disksiz "Xbox Series S" konsolunda istifadəsinə yol açır.

Bununla belə, bütün oyunlar dəstəklənmir və "Microsoft" rəsmi siyahı dərc etməyib. "Halo", "Gears of War", "Forza Horizon" kimi şirkətin öz oyunları işləyir, lakin 2015-ci ildə çıxan "Fallout 4" hələlik dəstəklənmir. "Xbox 360" və ilk "Xbox" diskləri isə funksiyaya daxil deyil.

Sistem həmçinin lisenziyanın diskə bağlı olduğunu və diskin saxlanmasını tövsiyə edir. Şirkət diskin vaxtaşırı yenidən daxil edilməsinin tələb olunub-olunmayacağını açıqlamayıb.

Qeyd edək ki, "Sony" 2028-ci ilə qədər fiziki disklərdən imtina etmək planını açıqlayıb. "Microsoft" isə "Project Helix" kod adlı növbəti konsolunun fiziki diskləri dəstəkləyib-dəstəkləməyəcəyi barədə hələ məlumat verməyib.