Süni intellektlə "Nintendo Switch" oyunları "Apple TV"-də işə salınıb

"Reddit" istifadəçisi "Claude" modelinin köməyi ilə "TVPort" adlı açıq mənbəli layihə hazırlayıb.

Engadget xəbər verir ki, "Reddit" istifadəçisi u/FloatingFalafel "Nintendo Switch" oyunlarını "Apple TV 4K" cihazında birbaşa işlədən "TVPort" adlı açıq mənbəli layihə təqdim edib. Layihə "nxnative" alətlər dəsti əsasında hazırlanıb və "Mac" kompüteri vasitəsilə "Switch" və "Switch 2" oyunlarını yenidən kompilyasiya edir.

Müəllif bildirib ki, iş zamanı "Claude Opus 5.5" süni intellekt modelindən istifadə edib. Onun sözlərinə görə, oyunların əksəriyyəti eyni qaydada işləyir, lakin bəziləri teksturaları yaddaşa fərqli yüklədiyi üçün əlavə düzəliş tələb edir. "TVPort" yaddaş fayllarını "Mac" və ya "iCloud"-a köçürə bilir, həmçinin 30 və 60 kadr/saniyə rejimləri arasında seçim imkanı verir.

Açıqlamaya görə, "Super Mario Odyssey" 60 kadr/saniyə ilə, nadir hallarda kiçik ləngimələr və bəzi səs problemləri ilə işləyir. "Animal Crossing: New Horizons" isə 30 kadr/saniyə ilə problemsiz çalışır. "The Legend of Zelda: Tears of the Kingdom" sınaqlar zamanı cihazın qızmasına səbəb olub və müəllif bu kimi ağır oyunların "Apple TV 4K" üçüncü nəslində heç vaxt işləməyə bilməyəcəyini qeyd edib.

Layihənin repozitoriyasında oyun faylları yoxdur, istifadəçilər faylları öz kartriclərindən qanuni yolla əldə etməlidir.

Qeyd edək ki, süni intellekt alətləri ilə oyunların digər platformalara köçürülməsi mübahisəli mövzu olaraq qalır. "decomp.dev" saytı bu səbəbdən fəaliyyətini dayandıracağını açıqlayıb, "Anthropic" isə "Claude Code"-a mövcud oyunları yenidən yaratmamaq göstərişi verib.

Mənbə: Engadget