The Verge xəbər verir ki, "Square Enix" bu həftə HD-2D üslubunda hazırlanmış ilk "Final Fantasy" oyununu, "Final Fantasy Resonance"ı istifadəçilərə təqdim edir. Oyun piksel qrafikanı detallı 3D mühitlə birləşdirir və seriyanın klassik hissələrini xatırladır.
Nəşrin yazdığına görə, oyun oynanış baxımından da köhnə üslubdadır: böyük dünya xəritəsi, təsadüfi döyüşlər, mehmanxana və mağazalı şəhərlər, növbəli döyüş sistemi. Süjetdə əsas qəhrəman Rain dostu Lasswell ilə birlikdə sehrli kristalların məhv edilməsinin qarşısını almağa çalışır.
Bununla yanaşı, oyunda müasir yeniliklər də var. Rəqiblərin sağlamlıq və "stagger" göstəriciləri, döyüşləri sürətləndirmək və uzun animasiyaları ötürmək imkanı, artıq ziyarət edilmiş yerlərə sürətli keçid funksiyası əlavə olunub. Oyunçular həmçinin "Visions" sistemi vasitəsilə Terra Branford və Cloud Strife kimi digər "Final Fantasy" personajlarını döyüşə cəlb edə bilir.
"Final Fantasy Resonance" oktyabrın 22-də "Nintendo Switch", "Nintendo Switch 2", PC, "PS5" və "Xbox Series X / S" platformalarında satışa çıxacaq.
Qeyd edək ki, oyun 2024-cü ildə bağlanmış mobil "Final Fantasy Brave Exvius" oyununun ilk süjet xəttinin adaptasiyasıdır. "Square Enix" daha əvvəl HD-2D üslubunda "Dragon Quest" seriyasının ilk hissələrinin remeyklərini də buraxıb.
Mənbə: The Verge
Bizi izləyin
Ən vacib texnologiya xəbərlərini sosial şəbəkələrdə qaçırmayın.
Növbəti xəbər
