"PlayStation Plus" 16 ildə necə dəyişib: 50 dollardan 160 dollara qədər

Sony-nin abunə xidməti 2010-cu ildə tək paketlə başlamışdı, indi isə üç səviyyəli modelə keçib və qiymətlər bir neçə dəfə artırılıb.

Engadget xəbər verir ki, "Sony"nin "PlayStation Plus" abunə xidməti 2010-cu ildə istifadəyə veriləndən bəri həm məzmun, həm də qiymət baxımından ciddi dəyişikliklərə məruz qalıb. Xidmətin ən ucuz illik paketi bu gün 80 dollardır, 2010-cu ildə isə bu məbləğ 50 dollar idi.

Xidmət 2010-cu ilin iyununda tək paket kimi təqdim edilib. Abunəçilər hər ay seçilmiş pulsuz oyunlar, əlavə məzmun, beta versiyalara erkən çıxış və tam oyun sınaqları əldə ediblər. Abunə illik 50 dollar, rüblük isə 18 dollar olub, aylıq seçim mövcud olmayıb. "PS4"ün çıxışı ilə onlayn multiplayer oyunlar üçün abunə məcburi hala gətirilib.

2016-cı ilin sonunda qiymətlər artırılıb və ilk dəfə 10 dollarlıq aylıq abunə təqdim edilib. Rüblük paket 25, illik paket isə 60 dollara qalxıb. 2022-ci ildə "Microsoft"un "Game Pass" xidməti ilə rəqabət üçün "Essential", "Extra" və "Premium" adlı üç səviyyəli model tətbiq olunub.

Hazırda "Essential" paketi ayda 11, rübdə 28, ildə 80 dollara başa gəlir. "Extra" paketi 400-ə qədər "PS4" və "PS5" oyununa çıxış verir və ayda 17, ildə 135 dollardır. "Premium" isə əlavə olaraq retro oyunların strim kitabxanasını təklif edir və ayda 20, ildə 160 dollar təşkil edir.

Qeyd edək ki, "Sony" bu il bir və üç aylıq abunələrin qiymətini "bazar şərtləri"ni əsas gətirərək aylıq 1 dollar artırıb. Eyni dövrdə "PS5" konsolunun qiyməti də 499,99 dollardan 650 dollara qədər yüksəlib, şirkət isə 2028-ci ildə tam rəqəmsal modelə keçməyi planlaşdırır.

Mənbə: Engadget