The Verge xəbər verir ki, "Nintendo Switch 2" konsolu sındırılıb. Moderlərdən biri artıq konsolda "Mario Kart World" oyununun dəyişdirilmiş versiyasını nümayiş etdirib. Bu versiyada Cinnamoroll, "Angry Birds"-ün qırmızı quşu, Peter Griffin və "Minecraft"-dan Steve kimi yeni personajlar oynanılır.

"pepsipu" ləqəbli Sammy Hajhamid-in sözlərinə görə, "ns2jb" adlı bu sındırma üsulunun hazırlanmasında "OpenAI"-ın "Codex" alətindən istifadə olunub. Üsul yalnız proqram təminatına əsaslanır və "tethered" tiplidir, yəni konsol hər dəfə yandırıldıqda onu oyun vasitəsilə yenidən işə salmaq lazımdır.

Sındırma üçün istifadəçilərə oyun yaratmaq və proqramlaşdırmaq imkanı verən "SmileBASIC 4" oyunu tələb olunur. Lakin başqa bir moder bu oyunun mütləq vacib olmadığını iddia edib.

Hazırda üsul əksər istifadəçilər üçün olduqca mürəkkəb görünür və onun real təsiri hələ aydın deyil. "Reddit"-də "Switch 2" sındırmalarına həsr olunmuş bölmənin istifadəçiləri hadisənin nə dərəcədə əhəmiyyətli olduğunu müzakirə edirlər.

Qeyd edək ki, mütəxəssislər bu hadisənin "Switch 2" üçün yeni zəifliklər silsiləsinin başlanğıcı ola biləcəyini düşünürlər, xüsusilə də moderlər bu işdə süni intellektdən daha geniş istifadə etməyə başlasalar.