"OnePlus Ace 7" smartfonları ikiaxınlı soyutma ventilyatoru ilə gələcək

Yeni seriya bu ay Çində təqdim olunacaq. Şirkət rəhbəri daxili ventilyatorun necə işlədiyini açıqlayıb.

GSMArena xəbər verir ki, "OnePlus" şirkəti "Ace 7" seriyasının bu ayın sonunda Çində təqdim olunacağını təsdiqləyib. Dəqiq tarix hələ açıqlanmasa da, şirkət "Weibo" platformasında qısa tanıtım videosu paylaşıb.

"OnePlus"un Çin üzrə prezidenti Li Jie yeni smartfonların arxa hissəsinin eskizini paylaşaraq ikiaxınlı soyutma sistemi barədə məlumat verib. Cihazlarda iki hava axını yolu olan daxili aktiv ventilyator quraşdırılacaq.

Birinci hava axını prosessoru soyudaraq isti havanı telefonun yan tərəfindən çölə çıxaracaq. İkinci axın isə sərin havanı arxa panelə yönəldəcək ki, oyun zamanı istifadəçinin əlləri tərləməsin və rahat qalsın.

Şirkətin sözlərinə görə, yeni seriya "Ace 6" modelləri ilə müqayisədə performans və korpus keyfiyyəti baxımından ciddi təkmilləşmələr təqdim edəcək.

Qeyd edək ki, iddialara görə, seriyaya "Ace 7" və "Ace 7 Pro" modelləri daxil olacaq. Smartfonların 200 meqapiksellik əsas kamera, 9000 mAh tutumlu batareya və "Snapdragon 8 Elite Gen 5" prosessoru ilə təchiz ediləcəyi gözlənilir.

Mənbə: GSMArena