"iFixit" qatlanan "iPhone Duo"nu sökdü: təmir balı 5/10, menteşə narahat edir

Apple-ın ilk qatlanan smartfonu rəqiblərindən daha asan təmir olunur, lakin bəzi cihazlarda menteşə ilişib ekranı zədələyir.

GSMArena xəbər verir ki, "iFixit" "Apple"ın ilk qatlanan smartfonu olan "iPhone Duo"nu söküb və cihaza təmir olunma üzrə 10 baldan 5 bal verib. Bu, qatlanan smartfonlar arasında yüksək göstərici sayılır. Müqayisə üçün, "Samsung Galaxy Z Fold8" 4, ondan əvvəlki model isə 3 bal alıb.

Mütəxəssislərin sözlərinə görə, cihazın əksər komponentləri dərinə müdaxilə etmədən çıxarıla bilir. Məsələn, xarici ekran vakuum sıxacı və aralayıcı alətlə asanlıqla sökülür. İki batareya isə anodik ayırma üsulu ilə çıxarılır: batareya üzərindəki gümüş kontaktlara 9 voltluq batareya kimi aşağı gərginlikli enerji mənbəyi qoşulduqda elementlər korpusdan ayrılır.

Sökülmə zamanı əsas ekranın mat nano-tekstura örtüyü də mikroskop altında araşdırılıb. Üzərindəki minlərlə mikroskopik qabarıqlıq əksləri dağıdaraq OLED panelin ortasındakı qatı gizlədir. Bu effekti müxtəlif bucaqlarda yerləşdirilmiş RGB subpiksellər də gücləndirir.

Bununla belə, cihazın mürəkkəb menteşə mexanizmi narahatlıq yaradıb. Bəzi ilk istifadəçilər menteşənin müəyyən nöqtələrdə bərkidiyini, açılış zamanı çırtıltı səsi eşidildiyini və ekranın birdəfəlik zədələndiyini bildiriblər. Ehtimallardan birinə görə, menteşədəki bəzi hissələr düzgün enmir və ilişib qalır, digər səbəb isə menteşədən keçən "akkordeonvari" çevik kabel ola bilər.

Qeyd edək ki, "iPhone Duo"nun 12 GB operativ yaddaşlı 256 GB-lıq versiyası Avropada 2299 avro, Böyük Britaniyada isə 1999 funt sterlinqə satılır.

Mənbə: GSMArena