9to5Mac xəbər verir ki, "Apple" tərtibatçıların qatlanan "iPhone Duo" smartfonuna "inanılmaz" dəstək göstərdiyini bildirib. Bu açıqlama ilkin rəylərdə üçüncü tərəf tətbiqlərinin cihaza zəif uyğunlaşdırılması ilə bağlı tənqidlərdən sonra gəlib.

Şirkətin məlumatına görə, "iPhone Duo"nun daxili ekranı "iPhone 18 Pro Max"-dan 50 faiz böyükdür. "Apple"-ın tərtibatçılarla əlaqələr üzrə vitse-prezidenti Syuzan Preskott tərtibatçıların böyük ekranı və yeni idarəetmə üsullarını sürətlə mənimsədiyini qeyd edib.

Yenilənmiş tətbiqlər arasında "Netflix", "Prime Video", "Paramount+", "MLB" və "PGA Tour" var. Məsələn, cihaz yarıqatlanmış vəziyyətdə olanda "Prime Video" videonu ekranın üst hissəsində, aktyorlar və əlavə məlumatları isə alt hissədə göstərir. "MLB" tətbiqi də canlı oyunla yanaşı real vaxt statistikasını təqdim edir.

"Apple" bildirib ki, "Microsoft Word" və "Outlook" yaxın həftələrdə masaüstü səviyyəli versiya alacaq, "Zoom", "Slack" və "Salesforce" isə öz yeniləmələrini hazırlayır. Siyahıda "Instagram", "Fantastical", "Things", "Bear" kimi tətbiqlər, həmçinin "Apple Arcade" oyunları "Sneaky Sasquatch" və "Retrocade" də yer alıb.

Qeyd edək ki, "iPhone Duo" satışa çıxdığı gün "Apple" "App Store"da cihaz üçün ən yaxşı tətbiq və oyunları ayrıca təqdim edəcək. İlkin rəylərdə bəzi tətbiqlərin ekranın mərkəzində kiçik pəncərə kimi, ətrafı qara sahə ilə göstərildiyi qeyd olunmuşdu.