"Apple Music"ə karaoke videosu çəkmək imkanı verən "Selfie Sing" funksiyası gəlir

Yeni funksiya "iOS 27.3" ilə istifadəyə veriləcək və mahnı sözləri ekranda axarkən özünüzü videoya çəkməyə imkan yaradacaq.

Engadget xəbər verir ki, "Apple Music" xidmətinə istifadəçilərin karaoke oxuyarkən özlərini videoya çəkməsinə imkan verən yeni funksiya əlavə olunacaq. "Selfie Sing" adlanan funksiya hazırda beta versiyada olan "iOS 27.3" ilə təqdim ediləcək.

"MacRumors"un məlumatına görə, yenilik şirkətin 2022-ci ildə təqdim etdiyi "Sing" karaoke funksiyasının təkmilləşdirilmiş variantıdır. İstifadəçi mahnını seçib kameranı aktivləşdirir, mahnının sözləri isə real vaxtda ekranda axır. Lakin funksiya xidmətin bütün kataloqunu deyil, yalnız xüsusi pleylisti dəstəkləyir.

Hazırda pleylistdə Kelly Clarkson-un "Since U Been Gone", One Direction-ın "What Makes You Beautiful", Madonna-nın "Like a Virgin", Britney Spears-in "Baby One More Time" və Dolly Parton-un "9 to 5" mahnıları yer alıb. Videonu yadda saxlamazdan və ya dostlarla paylaşmazdan əvvəl səsin həcmini dəyişmək və "Megaphone", "Echo", "Concert Hall", "Studio" effektlərindən istifadə etmək mümkündür.

Qeyd edək ki, "iOS 27.3" yeniləməsi həmçinin "Siri" üçün yeni süni intellekt funksiyaları və yenidən dizayn edilmiş "Health" tətbiqi gətirəcək. Əməliyyat sisteminin geniş istifadəyə bu ilin dekabrında təqdim olunacağı gözlənilir.

Mənbə: Engadget