Apple Los-Ancelesdə ilk sensor ekranlı "MacBook Pro"nu təqdim edə bilər

Şirkətin tədbiri ictimai canlı yayım olmadan keçirilir. Bu, "Mac" kompüterləri üçün sensor ekranlı ilk model ola bilər.

The Verge xəbər verir ki, "Apple" Los-Ancelesdə keçirdiyi tədbirdə sensor ekranlı, yenilənmiş "MacBook Pro" noutbukunu təqdim edə bilər. Gözləntilər özünü doğrultsa, bu, "Mac" kompüterləri arasında sensor ekrana malik ilk model olacaq. Burada vaxtilə bəzi modellərdə istifadə edilən "Touch Bar" paneli nəzərə alınmır.

Nəşrin yazdığına görə, "Apple" rəhbərləri "iPad" planşeti mövcud olduğu müddət ərzində sensor ekranlı noutbukları dəfələrlə tənqid ediblər. Buna baxmayaraq, şirkətin artan tələbi nəzərə alaraq istifadəçilərə "MacBook" ekranına toxunaraq idarəetmə imkanı verəcəyi gözlənilir.

Tədbir "iPhone" təqdimatlarından və ya "WWDC" konfransından fərqli formatda keçirilir. O, Kupertinodakı "Apple Park"da deyil, Los-Ancelesdəki tədbir məkanında baş tutur və ictimai canlı yayım nəzərdə tutulmayıb. The Verge-ə görə, təqdimatın bu ilin əvvəlində Nyu-Yorkda keçirilən "MacBook Neo" tədbirinə bənzəyəcəyi gözlənilir. Həmin tədbirdə yalnız iştirakçılar üçün nəzərdə tutulan təqdimat 10 dəqiqədən az çəkmişdi.

Qeyd edək ki, "Apple" bu həftə artıq bir neçə yenilik açıqlayıb. Şirkət bazar ertəsi OLED ekranlı yeni "iPad Mini" planşetini, çərşənbə axşamı isə "M6" prosessoru ilə təchiz olunmuş "MacBook Pro" və "iMac" modellərini təqdim edib. Bu "Mac" kompüterləri əvvəlki versiyalarla eyni dizaynı saxlayıb.

Mənbə: The Verge