Apple "iPhone Duo" üçün dəstək sənədləri dərc edib: menteşə və "Touch ID" diqqətdə

Sənədlərdə qatlanan smartfonun menteşə nasazlıqları, qoruyucu üzlüklə istifadə və ekran problemlərinin həlli izah olunur.

9to5Mac xəbər verir ki, "Apple" "iPhone Duo" smartfonunun satışa çıxması ilə əlaqədar bir sıra dəstək sənədləri dərc edib. Şirkət bunu hər yeni "iPhone" modelinin təqdimatında edir.

Sənədlərdən biri menteşə ilə bağlı problemlərə həsr olunub. Burada cihazın tam açılıb-bağlanmaması, açılarkən və ya bağlanarkən gözlənilməz səs, menteşənin boşalması, əyilməsi və ya qırılması, eləcə də korpusun menteşənin işinə təsir edən zədələri kimi hallarda nə etmək lazım olduğu izah edilir.

Digər sənəddə xarici ekranın sol kənarını qismən örtən "iPhone Duo Case" üzlüyü üçün proqram təminatı tənzimləmələri təsvir olunub. Üzlük taxıldıqdan sonra ekranda görüntü ölçüsünü uyğunlaşdırmaq təklifi çıxır. Bunu istənilən vaxt "Settings" bölməsində "Display & Brightness" menyusundan "Shift Left Edge" funksiyasını aktivləşdirməklə də etmək mümkündür.

Dərc olunan sənədlər arasında həmçinin orijinal "Touch ID" düymələri, cihazın yanmaması və ya ekranların qara qalması, düymə, "Bluetooth" və "Wi-Fi" problemləri, ekran və "Multi-Touch" nasazlıqları, eləcə də şifrə unudulduqda cihazın Mac və ya PC vasitəsilə sıfırlanması barədə təlimatlar var.

Qeyd edək ki, "iPhone Duo" ilə bağlı məlumatlar "iPhone" istifadəçi bələdçisinə də əlavə edilib. Mənbəyə görə, "Apple" yaxın günlərdə yeni dəstək sənədləri dərc etməyə davam edəcək.

Mənbə: 9to5Mac